ئەنەکەسێ داخویانیەک دەربارێ تاوانا ئێشکەنجەکرن و کوشتنا عەلا ئەمین پارڤەکر
سەکرەتەریا گشتی یا ئەنجومەنا نشتمانی یا کورد ل سووریێ (ئەنەکەسە)، ب توندترین شێوە تاوانا ھۆڤانەیا کو بوو سەدەما کوشتنا جوانێ ب ناڤێ عەلا ئەمین د ناڤ زیندانێن دەزگەھێن ئەولەھیێ یێن سەر ب رێڤەبەریا پەیەدێ دە، شەرمەزار دکە.
ئەڤ جوان پشتی ڤەگەرا وی ژ وەلاتێ سوێدێ ھاتبوو گرتن و پێنج مەھان ھاتبوو ونداکرن. بەریا کو د 8ێ ئادارێ دە جەنازەیێ وی رادەستی مالباتا وی بکن، ب شێوەیەکی کو ژ نرخێن جڤاکا مەیا کوردی و ژ ھەموو قانوونێن مرۆڤی دوورە، راپۆرتێن پزیشکی ژی پێ رە شاندن دا کو تشتێن کو د ھوندرێ گرتیگەھێ دە ھاتنە سەرێ وی ڤەشێرن.
ئەڤ تاوان، کو ل سەر تاوانێن دن زێدە دبە، فکارێن رەوا د ناڤ گەلێ مە دە چێدکە دەربارێ رەوشا گرتیێن دن و کەسێن کو ب زۆرێ ھاتنە ونداکرن. ژ بەر ڤێ یەکێ، سەکرەتەریا گشتی یا ئەنجومەنێ ڤان داخوازان دکە:
ڤەکرنا لێکۆلینەکا زەلال و سەربخوە د بن چاڤدێریا رێخستنێن مافێن مرۆڤان یێن پێباوەر دە، ژ بۆ ئەشکەرە کرنا ھەموو ھوورگولیێن ڤێ تاوانێ و دیارکرنا بەرپرسیاریان ب ئاوایەکی ھوور.
رادەستکرنا ھەر کەسێ کو دەستێ وی د ڤێ تاوانێ دە ھەبە ژ بۆ دادگەھێ، و سەپاندنا گرانترین سزایێن قانوونی ل سەر وان، دا کو مافێ قوربانی وەرە پاراستن و ببە میناک ژ بۆ ھەر کەسێ کو بخوازە تاوانێن وسا بکە.
ھەر وھا ئەم تەکەزیێ ل سەر گرتنا رێکارێن پێدڤی دکن ژ بۆ رێگرتنا ل دوبارەبوونا ڤان بوویەرێن ب ئێش، و ڤالاکرنا ھەموو زیندان و ناڤەندێن گرتنێ ب ئاوایەکی کو ئەولەھیا جڤاکێ و پاراستنا پێکھاتەیا وێ مسۆگەر بکە.
