سەرۆک بارزانی: 11ێ ئادارێ رۆژا ناسکرنا فەرمییا مافێن گەلێ کوردستانێیە
سەرۆک مەسعوود بارزانی د پەیامەکێ دە ب ھەلکەفتا سالڤەگەرا 56ێ یا پەیمانا 11ێ ئادارێ راگھاند؛ ئەو دەستکەفتیا دیرۆکی بەرھەما شۆرەشا ئیلۆنێ، بەرخوەدانا پێشمەرگە و ھەموو چین و تەوێژێن جڤاکێ بوو، کو حکوومەتا وێ دەمێ یا ئیراقێ نەچار کر ب فەرمی مافێن گەلێ کوردستانێ بناسە. ھەروھا تەکەزی ل سەر پاراستنا دەستکەفتیان و بەردەوامیا پەیاما ئاشتیانە و پێکڤەژیانێ کر.
سەرۆک بارزانی د پەیاما خوە دە گۆت: “پەیمانا 11ێ ئادارێ بەرھەما شۆرەشا ئیلۆنێ یا ب رێبەریا بارزانییێ نەمر و خەبات و فەداکاریا پێشمەرگە و ھەموو چین و تەوێژێن کوردستانێ بوو. بەرھەما وێ خەباتا خورت و سەرانسەر بوو کو ژ بۆ ڤەگەراندنا مافێن گەلێ کوردستانێ و پێکانینا دەمۆکراسیێ ل ئیراقێ دەست پێ کربوو و د داویێ دە حکوومەتا وێ دەمێ یا ئیراقێ نەچار کر کو ب ئاوایەکی فەرمی دان ب بەشەک ژ مافێن گەلێ مە دە بینە.”
ھەروھا د پەیامێ دە ھات گۆتن: “د سالڤەگەرا 56ێ یا پەیمانا 11ێ ئادارێ دە، ئەم روومەتا تێکۆشین و کەدا ھەموو وان پێشمەرگە، شۆرەشگەر و نشتمانپەروەرێن شۆرەشا ئیلۆنێ دگرن کو ب کەد و فەداکاریا خوە، دەستکەفتیا دیرۆکی یا پەیمانا 11ێ ئادارێ ژ بۆ گەلێ مە مسۆگەر کرن. د ڤێ بیرانینێ دە، ئەم تەکەزی ل سەر پاراستنا دەستکەفتیان و پەیاما ئاشتیانە و پێکڤەژیانا گەلێ کوردستانێ دکن و سلاڤان ژ بۆ روحا پاک یا شەھیدێن شۆرەشا ئیلۆنێ و ھەموو شەھیدێن کوردستانێ دشینن.”
ناڤەرۆکا پەیمانا 11ێ ئادارێ
ل گۆری پەیمانێ، زمانێن عەرەبی و کوردی دبن زمانێن فەرمی یێن ئیراقێ. ئەو ھەرێمێن کو پرانیا نشتەجھێن وان کوردن، دێ ب زمانێ دایکێ بخوینن؛ ھەڤدەم زمانێ عەرەبی ژی لگەل کوردی تێ خوەندن. خوەندەکارێن کو ھاتبوون دوورخستن، بێیی گوھدانا تەمەنێ وان، دێ ڤەگەرن سەر خوەندنا خوە.
د پەیمانێ دە ھاتبوو: “بریارێن حکوومەتێ یێن دەربارێ زمان دە تێن جیبجیکرن و ژ بۆ پێشخستنا ئاستا رەوشەنبیریا خەلکێ، د رادیۆ و تەلەڤزیۆنان دە بەرنامەیێن تایبەت ژ بۆ کوردان تێن دانین. کورد د حکوومەتێ دە بەشدار دبن و د وەزارەت و ئارتێشێ دە پارا وان دبە. فەرمانبەرێن ل ھەرێمێن کوردستانێ دڤێت زێدەتر کورد بن و ژ بۆ پۆستێن پارێزگار، قایمەقام و رێڤەبەرێن پۆلیسان، کەسێن کورد تێن ئەرکدارکرن.”
بریار ھاتبوو گرتن کو کارکەر و فەرمانبەرێن سڤیل و سەربازی ڤەگەرن سەر کارێ خوە. ھەروھا ھەرێمێن ھاتنە پاشگوھکرن بێن قەرەبووکرن، بودجەیەک ژ بۆ ڤەژاندن و پلانا گەشەپێدانا ئابۆری وەرە ڤەقەتاندن و ل گۆری یاسایێ مووچە ژ بۆ مالباتێن شەھیدان وەرە دابینکرن.
ل گۆری پەیمانێ، دێ بلەز خەبات ژ بۆ تەمامکرنا پرۆژەیان و دابینکرنا دەرفەتێن کار وەرە کرن. نشتەجھێن گوندێن عەرەب و کورد ڤەدگەرن سەر جھ و وارێن خوە و قەرەبوویا زیاندیتیان تێ کرن. یاسایا چاکسازیا چاندنیێ تێ جیبجیکرن و داوی ل دەرەبەگیێ تێ ئانین؛ جۆتکار ژی ژ باجێن رابۆری تێن بەخشاندن.
دەربارێ دەستوورا ئیراقێ دە، شۆرەشا ئیلۆنێ و پارتیا بەعس ل سەر وێ یەکێ ل ھەڤ کرن کو گەلێ ئیراقێ ژ دو نەتەوەیێن سەرەکە (عەرەب و کورد) پێک تێ. مکور ل مافێن گەلێ کورد د چارچۆڤەیا ئیراقێ دە تێ کرن و یەک ژ جیگرێن سەرۆککۆمار ژ بۆ کوردان دبە. یاسایا پارێزگەھان تێ گوھەرتن و ژ بۆ جیبجیکرنا ئۆتۆنۆمیێ، ئەو پارێزگەھ و ناڤچەیێن کو پرانیا وان کوردن تێن یەککرن. کورد ل گۆری ھەژمارا نفووسا خوە د دەستھلاتا قانووندانینێ دە بەشدار دبن.
ھەر چەند ئەڤ پەیمان د داویێ دە ژ ئالیێ حکوومەتا ئیراقێ ڤە نەھات جیبجیکرن ژی، لێ وەکی دەستکەفتیەکێ دیرۆکی ھاتە قەیدکرن و بوو بنگەھەک ژ بۆ بدەستخستنا مافێن زێدەتر ژ بۆ خەلکێ کوردستانێ.
سوودێن پەیمانا 11ێ ئادارێ:
– جارا یەکەم بوو کو دەستھلاتدارێن ئیراقێ مکور ل مافێن کوردان دە ھاتن.
– زمانێ کوردی بوو دویەمین زمانێ فەرمییێ وەلات.
– د وارێ سیاسی دە ئۆتۆنۆمی (خوەسەری) ھات چەسپاندن.
– بەشەک ژ داھاتا پەترۆلێ ژ بۆ کوردان ھات دیارکرن.
– لێبۆرینا گشتی ژ بۆ کەسێن بەشداری شۆرەشێ بووبوون ھات دەرخستن.
لێ بەلێ ب نرخاندنا رەوشا وێ دەمێ، رەژیما ئیراقێ سۆزێن خوە پێک نەئانین. پشتی چار سالان رەژیمێ جارەکە دن دەست ب دژمناتیا کوردان کر و ب رێیا پەیمانا لگەل شاھێ ئیرانێ (پەیمانا جەزاییرێ) و دایینا بەشەک ژ ئاخا وەلات، زەختێن ل سەر کوردان و شۆرەشا ئیلۆنێ زێدەتر کرن و گەلەک ستەمکاری و جینۆساید ل دژی کوردان پێکانین.
