مەکتەبا سیاسی یا پەدەکێ: ھەرێما کوردستانێ قەت نەبوویە بەشەک ژ ھەڤرکی و ئالۆزیان
مەکتەبا سیاسی یا پەدەکێ ئێریشا نەرەوا یا ل سەر ھێزێن پێشمەرگەیان ب توندی شەرمەزار کر و تەکەز کر کو، ھەرێما کوردستانێ قەت نەبوویە بەشەک ژ ھەڤرکی و ئالۆزیان، بەلکی ھەمی ئالی هاندانە کو رێیا دیالۆگێ بدن بەر خوە و بەردەوام تەکەز ل سەر سیاسەتا ئاشتیخوازانەیا کوردستانێ کریە.
مەکتەبا سیاسی یا پارتیا دەمۆکراتا کوردستانێ (پەدەکێ) ئیرۆ رۆژا سێشەمبی، 24ێ ئادارا 2026ێ، داخویانیەک وەشاند و تێ دە گۆت: ئەم وێ ئێریشا نەرەوا و بێ ھنجەت ب توندی شەرمەزار دکن، کو سەرێ سبەھا ئیرۆ ل سەر ھێزا پێشمەرگەیان ل سینۆرێ رێڤەبەریا سەربخوەیا سۆرانێ ھات کرن، کو مخابن بوو سەدەما شەھیدبوون و برینداربوونا ھەژمارەک ژ پێشمەرگەیێن دلسۆز.
مەکتەبا سیاسی یا پارتیا دەمۆکراتا کوردستانێ ھەروەسا راگھاند: ئەم ھەڤخەمیا خوە ژ بۆ مالباتێن شەھیدان یێن سەربلند و چارەبوونەکا بلەز ژ بۆ برینداران ژی دخوازین.
مەکتەبا سیاسی یا پەدەکێ تەکەز ژی کر کو، ھەرێما کوردستانێ قەت نەبوویە بەشەک ژ ھەڤرکی و ئالۆزیان و ھەمی ئالی ژ هاندانە کو رێیا دیالۆگێ بدن بەر خوە و بەردەوام تەکەز ل سەر سیاسەتا ئاشتیخوازانەیا کوردستانێ کریە.
د وێ داخویانیێ دە ھەروەسا ھات گۆتن: مخابن، ھەر ژ دەستپێکا سەرھلدانا شەر و ئالۆزیان ل دەڤەرێ ڤە، گەلەک ئێریشێن نەرەوا و دژمنانە ل سەر ھەرێما مە ھاتنە کرن کو یا ھەری داویێ ئێریشا سەرێ سبەھا ئیرۆ یا ب مووشەکێن ئیرانی بوو. ئەم ب نیگەرانیەکا زێدە ل ڤان پێشڤەچوونان دنێرین.
مەکتەبا سیاسی یا پەدەکێ ھەروەسا گۆت: ئەم ژ حکوومەتا فەدەرال و دەزگەھێن پەیوەندیدار چاڤەرێ دکن کو د زووترین دەم دە سینۆرەکی ژ بۆ وان دەستدرێژیان دانن یێن کو ل سەر ئاخا ھەرێما کوردستانێ تێن کرن و ئەرکێ خوەیێ دەستووری ژ بۆ پاراستنا وەلاتیان ب جیھ بینن.
مەکتەبا ناڤبری د داویا داخویانیا خوە دە ژی بانگ ل ھەمی ھێز و ئالیێن کوردستانی دکە کو، ب یەک گۆتارێ و یەک ھەلوەستێ ل دژی ڤان پێشڤەچوونان راوەستن و پەیام و ھەلوەستا خوەیا نەتەوەیی ل بەرانبەری وێ بنپێکرن و زلمێ نیشان بدن یا کو د دەرحەقا وەلاتیان و ھەرێما مە دە تێ کرن.
ئەڤ ژی د دەمەکێ دەیە کو، بنگەھێن پێشمەرگەیان ل قەزایا سۆرانێ ئیرۆ رۆژا سێشەمبی، 24ێ ئادارا 2026ێ، د دو ئێریشێن جودا دە ژ ئالیێ کۆمارا ئیسلامی یا ئیرانێ ڤە ب مووشەکێن بالیستیک ھاتن ئارمانجکرن و د ئەنجامێ دە شەش پێشمەرگە شەھید بوون و 30 پێشمەرگەیێن دن ژی بریندار بوون.
