ھەڤپەیمانیا کرستیانان: پێشمەرگە مەرتالا پاراستنا ھەمی پێکھاتەیانە
ھەڤپەیمانیا کرستیانان ل ئیراق و ھەرێما کوردستانێ ئێریشێن ب مووشەکانێن ل سەر بنگەھێن ھێزا پێشمەرگەیان ل سۆرانێ شەرمەزار کر و داخوازا دانانا سینۆرەکی ژ بۆ وان بنپێکرنان کر.
ھەڤپەیمانیا کرستیانان ل ئیراق و ھەرێما کوردستانێ د داخویانیەکێ دە راگھاند کو، وان ب خەم و کۆڤانەکە زێدە ڤە چاڤدێریا وێ ئێریشا ستەمکارانە کر یا کو ل سەر ھێزا پێشمەرگەیان ھات کرن و بوو سەدەما شەھیدبوون و برینداربوونا گەلەک پێشمەرگەیان.
ھەڤپەیمانیا ناڤبری رۆن ژی کر کو، ئەو ب توندترین ئاوا وێ ئێریشێ شەرمەزار دکن یا کو ھێزەکا نەتەوەیی و دەستووری کریە ئارمانج، کو ھەر گاڤ ژ بۆ گەلێن کوردستان و ئراقێ مەرتالەکە پاراستنێ بوویە.
وێ ھەڤپەیمانیێ د بەشەکا دن یا داخویانیێ دە گۆت کو، ھەولێرێ رێبازا بێالیتیێ دایە بەر خوە و ھەر گاڤ بزاڤ کریە کو ژ بۆ ئاشتیێ ببە پرەک، ژ بەر ڤێ یەکێ ژی مخابنە کو ل شوونا خەلاتان، قادا پەڤچوونان ژ بۆ دەڤەرەکا ئارام بێ ڤەگوھەستن.
ھەڤپەیمانیا کرستیانان ھەروەسا پەسنێ رۆلا دیرۆکی یا ھێزێن پێشمەرگەیان دا، نە تەنێ د بەرەڤانیکرنا ژ ئاخا کوردستانێ دە، بەلکی ل رێزا پێشیێ پاراستنا کرستیانان و پێکھاتەیێن دن، ھەروەسا د شکاندنا ئەفسانەیا چەکدارێن داعشێ دە ژی تەڤلیبوویییێن یەکالیکەر بوون.
ھەڤپەیمانیا کرستیانان د داویا داخویانیا خوە دە ژی پشتگریا خوە ژ بۆ پەیاما پاپایێ ڤاتیکانێ پاپا لۆیێ 14ێ ژ بۆ راوەستاندنا شەر دیار کر.
ھەڤپەیمانیا ناڤبری ھەروەسا بانگ ل حکوومەتا فەدەرال، نەتەوەیێن یەکگرتی، ئەنجوومەنا ئەولەکاریێ و جڤاکا ناڤنەتەوەیی کر کو، ھەلوەستەکا زەلال ژ بۆ بداویانینا وان ئێریشێن کو ل سەر ھەرێما کوردستانێ تێن کرن و پاراستنا ژیانا سڤیلان ھەبە.
ئەڤ ژی د دەمەکێ دەیە کو، بنگەھێن پێشمەرگەیان ل قەزایا سۆرانێ ئیرۆ رۆژا سێشەمب، 24ێ ئادارا 2026ێ، د دو ئێریشێن جودا دە ژ ئالیێ کۆمارا ئیسلامی یا ئیرانێ ڤە ب مووشەکێن بالیستیک ھاتن ئارمانجکرن و د ئەنجامێ دە شەش پێشمەرگە شەھید بوون و 30 پێشمەرگەیێن دن ژی بریندار بوون.
