ئیمارات ئێریشا ل سەر مالا نێچیرڤان بارزانی ب توندی شەرمەزار کر

سەرۆکێ دەولەتا ئیماراتێ و وەزارەتا دەرڤەیا وی وەلاتی، ئێریشا ب درۆنان یا ل سەر مالا سەرۆکێ ھەرێما کوردستانێ نێچیرڤان بارزانی ب توندی شەرمەزار کرن و پشتگریا خوەیا تام ژ بۆ ئارامیا ھەرێمێ نیشان دان.

سەرۆکاتیا ھەرێما کوردستانێ راگھاند کو سەرۆکێ ئیماراتێ، شێخ محەمەد بن زایید ئەل نەھیان، ب رێیا تەلەفۆنێ پەیوەندی ب سەرۆک نێچیرڤان بارزانی رە کریە. د ڤێ پەیوەندیێ دە، شێخ محەمەد بن زایید ئێریشا کو ل باژارێ دھۆکێ ھاتبوو کرن وەکی کریارەکی “تاوانکاری” پێناسە کر و ب توندی شەرمەزار کر.

سەرۆکێ ئیماراتێ تەکەز کر کو وەلاتێ وی ژ بۆ پاراستنا ئەولەھی و تەناھیا ئیراق و ھەرێما کوردستانێ ھەر دەم ئامادەیە.

نێچیرڤان بارزانی، سەرۆکێ ھەرێما کوردستانێ ژی ژ بۆ ڤێ ھەلوەستا برایانە و پشتگریا بەردەواما ئیماراتێ سپاسیا شێخ محەمەد کر.

ژ ئالیەکی دن ڤە، وەزارەتا دەرڤەیا ئیماراتێ ئیرۆ یەکشەمێ رۆژا 29ێ ئادارا 2026ێ، داخویانیەکا فەرمی وەشاند. د داخویانیێ دە ھات دیارکرن کو ئیمارات ل دژی ھەر ھەولەکێ یە کو ئارمانجا وێ تێکدانا ئارامیا ھەرێمێ بە.

“دەولەتا ئیماراتێ ب توندترین ئاوا ڤێ دەستدرێژیا تاوانکاری شەرمەزار دکە. ئەم د ڤێ رەوشا دژوار دە ب دلسۆزی ل گەل سەرۆک نێچیرڤان بارزانی، مالباتا وی و حکوومەتێن ئیراق و ھەرێما کوردستانێ نە.” — وەزارەتا دەرڤەیا ئیماراتێ

د بەشا داوییا پەیوەندیا ھەر دو لیدەران دە، رەوشا ئالۆزا دەڤەرێ و ئەنجامێن شەر ھاتن نرخاندن. ھەر دو ئالیان ل سەر گرنگیا خەباتێن دیپلۆماتیک ژ بۆ بداویکرنا شەری و چەسپاندنا ئاشتیێ ل رۆژھلاتا ناڤین ل ھەڤ کرن.