ئۆمێد خۆشناو: زێدەتری 500 ئێریشێن درۆنی و مووشەکی ل سەر هەولێرێ هاتنە کرن

پارێزگارێ هەولێرێ ئۆمێد خۆشناو راگهاند، ژ دەستپێکا ئالۆزی و راگەشیێن ناڤچەیێ ڤە، سینۆرێ پارێزگەها هەولێرێ رووبروویی زێدەتری 500 ئێریشێن درۆنی و مووشەکی بوویە. خۆشناو داخواز ژ حکوومەتا ئیراقێ کر کو ل هەمبەری ڤان ئێریشان خوەدی هەلوەست بە و زیاندیتیان قەرەبوو بکە.

پارێزگارێ هەولێرێ ئۆمێد خۆشناو ئیرۆ 2ێ نیسانێ د کۆنفەرانسەکە رۆژنامەڤانیێ دە، ئامارێن ئێریشێن ل سەر پایتەختا هەرێما کوردستانێ ئەشکەرە کرن. خۆشناو دیار کر، هەولێر بوویە ئارمانجا زینجیرەیەکە ئێریشێن نەرەوا و هەتا نها زێدەتر ژ 500 درۆن و مووشەکان ل سینۆرێن پارێزگەهێ کەتنە.

پارێزگارێ هەولێرێ بال کشاند سەر ئارمانجێن ڤان ئێریشان و گۆت، کۆمێن “تەرۆریست و میلیشیایێن چەکدار”ێن ل دەرڤەیی دەستهلاتا هەرێمێ، نە تەنێ سڤیلان، لێ بنەسازیا ئابۆری یا هەرێما کوردستانێ ژی کرنە ئارمانج. خۆشناو وەکی میناک، ئاماژە ب ئێریشێن سەر کێلگەها غازێ یا کۆرمۆر و پارزوونگەهێن پەترۆلێ کر.

ئۆمێد خۆشناو نەرازیبوونا خوە ل هەمبەری بێدەنگیا حکوومەتا فەدەرالا ل بەغدایێ ئانی زمان و گۆت: “ئەڤ ئێریش ب وەشاندنا داخویانیان و شەرمەزارکرنێ بداوی نابن. پێویستە حکوومەتا ئیراقێ بەرپرسیاریا خوە بجهـ بینە و رێ ل بەر ڤان بنپێکرنان بگرە کو ژ دەڤەرێن د بن دەستهلاتا وان دە تێن ئەنجامدان.”