نێچیرڤان بارزانی: دڤێت حکوومەتا فەدەرال ماف و ناسنامەیا کوردێن فەیلی ڤەگەرینە
سەرۆکێ ھەرێما کوردستانێ نێچیرڤان بارزانی، د سالڤەگەرا 46ێ یا جینۆسایدا کوردێن فەیلی دە پەیامەک بەلاڤ کر و بانگ ل حکوومەتا فەدەرالا ئیراقێ کر کو ئەرکێن خوەیێن یاسایی و ئەخلاقی ل ھەمبەری ڤێ پێکھاتەیێ پێک بینە. بارزانی داخواز کر کو قەرەبوویا مادی و مەعنەوییا قوربانیان وەرە کرن و ناسنامە و ملکێن وان وەرن ڤەگەراندن.
“جینۆساید نژادپەرەستیا رەژیما بەعس بوو”
سەرۆک نێچیرڤان بارزانی د پەیاما خوە دە بال کشاند سەر ئێش و ئازارێن کوردێن فەیلی و دەستنیشان کر کو ئەڤ پێکھاتە تەنێ ژ بەر ناسنامەیا خوەیا نەتەوەیی رووبروویی جینۆساید، دەربدەرکرن و ونداکرنێ بوویە. بارزانی گۆت: “دەربدەرکرنا ب سەدان ھەزار کوردێن فەیلی و بێسەرووشوونکرنا ب دەھان ھەزاران ژ وان، جینۆسایدەکا نژادپەرەستانەیا حیزبا بەعس بوو کو دیرۆکەکە رەش و رابردۆیەکا تەعل ژ بۆ ئیراقێ ل دوو خوە ھشت.”
سەرۆکێ ھەرێما کوردستانێ ب بیر خست کو دادگەھا بلندا تاوانان یا ئیراقێ ئەڤ تاوان وەکی “جینۆساید” ناس کریە. ل سەر ڤێ بنگەھێ، وی بانگ ل بەغدایێ کر کو:
ل گۆری بریارێن دادگەھێ، قەرەبوویا مادی و مەعنەوی یا زیاندیتیان بکە.
ناسنامەیێن ھەموەلاتیبوونێ یێن ھاتنە زەفتکرن، جاردن بدە کوردێن فەیلی.
مال و ملکێن وانێن کو د دەما رەژیما بەرێ دە ھاتنە دەستەسەرکرن، بۆ وان ڤەگەرینە.
نێچیرڤان بارزانی د بەردەوامیا پەیاما خوە دە پەسنا دلسۆزی و قوربانیدانا کوردێن فەیلی دا و دیار کر کو ئەو دێ ھەر دەم پشتەڤانیا داخوازێن وان یێن رەوا بکن. بارزانی ھەروھا تەکەز کر کو دڤێت ئەڤ رابردۆیا تەعل ببە “پەند و وانە” ژ بۆ ئاڤاکرنا پێشەرۆژەکە باشتر ل سەر بنگەھا پێکڤەژیان و ھەڤدوقەبوولکرنێ ل ئیراقێ.
سەرۆکێ ھەرێما کوردستانێ پەیاما خوە ب سلاڤکرنا جانێ پاکێ شەھیدێن کوردێن فەیلی و ھەموو شەھیدێن کوردستانێ ب داوی کر.
