سەرۆک بارزانی: ئەرکا ئراقێیە کو قەرەبوویا جینۆسایدا کوردێن فەیلی بکە
سەرۆک مەسعوود بارزانی، ب بۆنەیا سالڤەگەرا 46ێ یا جینۆسایدا کوردێن فەیلی پەیامەک بەلاڤ کر و راگھاند کو دەولەتا ئیراقێ ب قەرەبووکرنا ماددی و مەعنەوی یا ڤێ پێکھاتەیێ بەرپرسیارە. سەرۆک بارزانی دەستنیشان کر کو 4ێ نیسانێ د دیرۆکا گەلێ کوردستانێ دە وەکی “رۆژەکا خەمگین و تژی ئێش” جھ دگرە.
سەرۆک بارزانی د پەیاما خوە دە بال کشاند سەر ھۆڤیتیا رەژیما بەرێ یا ئیراقێ و دیار کر کو کوردێن فەیلی تەنێ ژ بەر ناسنامەیا خوە یا نەتەوەیی رووبروویی زلم و کۆمکوژیان بوونە. سەرۆک بارزانی گۆت: “شەھیدکرنا ب ھەزاران جوانان، زەفتکرنا ناسنامەیێ و دەرخستنا ب دەهان هەزار مالباتێن کوردێن فەیلی، بەشەک ژ وان پلانێن سیستەماتیک بوون کو ژ ئالیێ رەژیما بەرێ ڤە ل دژی گەلێ کوردستانێ دھاتن مەشاندن.”
سەرۆک مەسوود بارزانی تەکەز کر کو بەرپرسیاریا قەرەبووکرنا ڤان کارەساتان ل سەر ملێ دەولەتا ئیراقێیە. سەرۆک بارزانی داخواز کر کو ھەموو ئێش و زیانێن کو گھیشتنە کوردێن فەیلی وەرن قەرەبووکرن و مافێن وان یێن ھەموەلاتیبوونێ ب تەمامی وەرن پاراستن.
د بەشەکە دنا پەیاما خوە دە، سەرۆک بارزانی پەسنا رۆلا دیرۆکی یا کوردێن فەیلی د شۆرەش و تەڤگەرا ئازادیخوازا کوردستانێ دە دا و گۆت: “رۆلا تێکۆشەرێن کوردێن فەیلی د پشتگریکرنا دۆزا گەلێ مە دە چ جارانی نایێ ژبیرکرن. ئەو ھەر دەم بەشەکی ئەزیز و روومەتدارێ گەلێ کوردستانێ نە.”
سەرۆک بارزانی پەیاما خوە ب سلاڤکرنا گیانێ پاکێ شەھیدێن کوردێن فەیلی و ھەموو شەھیدێن کوردستانێ ب داوی کر.
