مەسروور بارزانی: بریارا 688 ژ بۆ پاراستنا کوردستانێ وەرچەرخانەکە دیرۆکی بوو

سەرۆکێ حکوومەتا ھەرێما کوردستانێ، مەسروور بارزانی، ب ھەلکەفتا سالڤەگەرا دەرچوونا بریارا 688ێ یا ئەنجوومەنا ئەولەھیێ یا نەتەوەیێن یەکبوویی پەیامەک بەلاڤ کر و تێ دە تەکەزی ل سەر گرنگیا ڤێ بریارێ د دیرۆکا گەلێ کوردستانێ دە کر.

سەرۆکوەزیر مەسروور بارزانی دەستنیشان کر کو بریارا 688، کو د 5ێ نیسانا 1991ێ دە ھاتبوو پەژراندن، د بەرسڤدانا جڤاکا ناڤنەتەوەیی دە بۆ پاراستنا خەلکێ کوردستانێ “وەرچەرخانەکە دیرۆکی” بوو. ئەڤ بریار بوو بنگەھا ئاڤاکرنا “دەڤەرا ئەولە” کو گەلێ کوردستانێ ژ ئێریش و کۆمکوژیێن رەژیما وێ دەمێیا ئیراقێ پاراست.

د پەیاما خوە دە، مەسروور بارزانی ب تایبەتی سپاسیا وەلاتێن دۆست و ھەڤالبەند کر و گۆت، “مە گەلەک سپاسی و رێز ژ بۆ ئالیکاری و پشتڤانیا دۆستێن خوە ل وەلاتێن ئامەریکا، بریتانیا و فرانسایێ ھەنە. ھەڤکاری و پشتڤانیا وان د وان رۆژێن دژوار دە ھیچ جاران نایێن ژبیرکرن.”

بریارا 688ێ نە تەنێ رێ ل بەر کۆچا ملیۆنی یا کوردان گرت، لێ د ھەمان دەمێ دە بوو زەمینا یاسایی کو پشتی وێ سازیێن فەرمی یێن ھەرێما کوردستانێ ئاڤا ببن. سەرۆکوەزیر ب ڤێ پەیامێ جارەکە دن پابەندبوونا ھەرێما کوردستانێ ب پێوەندیێن ناڤدەولەتی و پاراستنا دەستکەفتێن دیرۆکی دوبارە کر.