سەرۆکوەزیر مەسروور بارزانی پێشوازی ل ئاگربەستا ناڤبەرا ئامەریکا و ئیرانێ دکە
سەرۆکوەزیرێ ھەرێما کوردستانێ مەسروور بارزانی پێشوازی ل ئاگربەستا ناڤبەرا ئامەریکا و ئیرانێ کر و ھێڤی خوەست کو ئەڤ پێنگاڤ ببە بنگەھەک ژ بۆ مسۆگەرکرنا ئاشتی و ئارامیا دەمدرێژ ل سەرانسەرێ ناڤچەیێ.
سەرۆکوەزیر مەسروور بارزانی ئیرۆ 8ێ نیسانێ د پەیامەکێ دە ل سەر تۆرا جڤاکی “X”ێ راگھاند، ئەو ھێڤیدارە ئاگربەستا ناڤبەرا ئامەریکا و ئیرانێ بەردەوام بکە و ببە رێخوەشکەر ژ بۆ بدەستخستنا ئارامیەکە ماییندە.
سەرۆکوەزیر د پەیاما خوە دە بال کشاند سەر ئێرشێن کو د دەمێن بۆری دە ل سەر ھەرێما کوردستانێ ھاتنە کرن و گۆت: “ئێرشێن ل سەر ھەرێما کوردستانێ د ت دەمێ دە نە رەوا بوون و ت ھنجەتێن وان تونەبوون.”
ھەروھا سەرۆکوەزیر ھێڤی خواست کو د بن سیوانا ڤێ ئاگربەستێ دە، ئێدی ھەموو ئێرشێن ل سەر وەلاتیێن سڤیل، ھێزێن پێشمەرگە، ژێرخانا ھەستیار و نوونەرتیێن دیپلۆماتیک ب تەمامی راوەستن.
مەسروور بارزانی ھەر وھا سپاسیا ھەموو وان ئالیان کر کو د دەمێن دژوار دە پشتگریا ھەرێما کوردستانێ کرنە و د پاراستنا ھەرێما کوردستانێ دە بوون ئالیکار.
د داویا پەیاما خوە دە، سەرۆکوەزیر تەکەز کر کو ھەرێما کوردستانێ ژ بۆ کێمکرنا راگەشیان، ھەر تم ئامادەیە و پشتگریێ ددە ھەر ھەولدانەکە دیپلۆماتیک کو ببە سەدەما ئاشتیەکە ماییندە ل ناڤچەیێ و ئەڤ دەرفەتا ئاگربەستێ ژ بۆ چارەسەرکرنا کێشەیان ب ئاوایەکی ئاشتیانە وەرە بکارانین.
