پەدەکە: ئەم سەرۆککۆمارێ نوو ناس ناکن؛ پێڤاژۆیا ھلبژارتنێ نەقانوونییە
مەکتەبا سیاسی یا پارتیا دەمۆکراتا کوردستانێ (پەدەکێ)، ب داخویانیەکە توند ھەلوەستا خوە ل دژی ھلبژارتنا سەرۆککۆمارێ نوویێ ئیراقێ نیشان دا. پەدەکێ راگھاند کو ئەو ب چ ئاوایی دانپیدانێ ب رەواتیا ڤێ پێڤاژۆیێ ناکن و کەسێ ھاتیە ھلبژارتن وەکی نوونەرێ گەلێ کوردستانێ نابینن.
مەکتەبا سیاسی یا پەدەکێ د داخویانیا خوەیا فەرمی دە کو رۆژا شەمیێ (11ێ نیسانا 2026ێ) بەلاڤ کر، بال کشاند سەر جڤینا پارلامەنتۆیا ئیراقێ و دیارکرنا سەرۆککۆمار. پەدەکێ دەستنیشان کر کو ئەڤ پێڤاژۆ ب بنپێکرنەکە ئەشکەرەیا قانوون و پەیرەوا ناڤخوەیا پارلامەنتۆیێ ب رێ ڤە چوویە. ل گۆری داخویانیێ، سەرۆکاتیا پارلامەنتۆیێ بێی ل بەر چاڤگرتنا رێبازێن قانوونی بەرنامەیا جڤینێ دیار کریە.
د داخویانیێ دە ھات تەکەزکرن کو پۆستا سەرۆککۆماریێ ملکێ ھەموو گەلێ کوردستانێیە، نەیێ پارتیەکە تایبەتە. پەدەکە رەخنێ ل وێ یەکێ دگرە کو بەربژارێ سەرکەفتی (نزار محەمەد ئامێدی) ل دەرڤەیی میکانیزما نیشتمانی یا کوردستانێ و تەنێ ب لھەڤکرنا ئالیەکی سیاسی و چەند پێکھاتەیێن دن یێن ئیراقێ ھاتیە سەپاندن.
پەدەکێ ب ئاوایەکی فەرمی راگھاند کو ئەو کەسێ ب ڤی ئاوایی بوویە سەرۆککۆمار، وەکی نوونەرێ پرانییا خەلکێ کوردستانێ ناس ناکن و سەرەدەریێ لگەل وی ناکن. ھەر وھا ھات دیارکرن کو پشتی فراکسیۆنا پەدەکێ جڤین بایکۆت کریە، دڤیابوو ناڤێ بەربژارێ وان ژ لیستەیا دەنگدانێ ھاتبا دەرخستن، لێ ئەڤ یەک نەھاتیە کرن.
ژ بۆ نرخاندنا ڤێ کریزا سیاسی و دیارکرنا ھەلوەستێن بهێت، مەکتەبا سیاسی یا پەدەکێ بریار دا کو فراکسیۆنا خوە یا ل پارلامەنتۆیا ئیراقێ و نوونەرێن خوەیێن د ناڤ حکوومەتا فەدەرال دە بانگهیشتی ھەرێما کوردستانێ بکە. تێ پایین کو پشتی ڤان جڤینان پەدەکە بریارێن گرینگتر دەربارێ پێڤاژۆیا سیاسی یا ل بەغدایێ بدە.
