پشتی گرتنا خالد بەگێ جبری و یووسووف زییا بەگ، ب حەرکاندنەکا دەولەتا ترکییەیێ، سەرھلدان بەری دەما کو ھاتبوو پلان کرن دەست پێ کر. رێبەرێ نەتەوەیی، ئۆلی و جڤاکی یێ گەلێ کوردستانێ شێخ سەعید سەرۆکاتییا ڤێ سەرھلدانێ کر. ل گۆری بریارا دیوانا حەربێ یا بەدلیسێ کو دیوانەکا حەربێ یا کو ب دەستھلاتییێن تایبەتی یێن دەولەتا ترکییەیێ ڤە ھاتبوو وەزیفەدار کرن، د رۆژا 14ێ نیسانا 1925ێ دە، ل بەدلیسێ خالد بەگێ جبری و یووسف زیا بەگ ھاتن کوشتن. ھەتا نھا ژی نایێ زانین کا ھەردو رێبەرێن ملەتێ کورد ب گولەبارانکرنێ یان ژی ب دارڤەکرنێ ھاتنە قەتلکرن. ھەردو رێبەرێن گەلێ کوردستانێ، ژ بەر دامەزراندنا تەشکیلاتا ئازادییێ و ئامادەکارییێن سەرھلدانەکا نەتەوەیی ھاتن قەتلکرن. د هەمان رۆژێ دە، ب قەرارا دیوانا حەربێ یا بەدلیسێ رێبەرێن ملەتێ کورد عەلی رزا بەگ، بەھائەدین بەگ، فایێق بەگ و مەلا عەبدولرەحمانێ شرنەخی ژی ھاتن دارڤەکرن. مخابن ھەتا ئیرۆ جیھێ مەزەلێن خالد بەگێ جبری، یوسف زیا بەگ عەلی رزا بەگ، بەھائەدین بەگ، فایێق بەگ و مەلا عەبدولرەحمانێ شرنەخی وەکە جیھێ مەزەلێن شێخ سەعید، سەیید رزا و ھەڤالان وان، سەعیدێ کوردی ژی ژ ئالییێ دەولەتا ترکییەیێ ڤە نەھاتینە ئەشکەرە کرن.
ئەم ب ڤێ مناسەبەتێ جارەکە دن بانگی دەولەتا ترکییەیێ دکن کو جیھێ مەزەلێن شێخ سەعید، سەیید رزا و ھەڤالێن وان، سەعیدێ کوردی، خالد بەگێ جبری، یوسف زیا بەگ، عەلی رزا بەگ، بەھائەدین بەگ، فایێق بەگ و مەلە عەبدولرەحمانێ شرنەخی ئەشکەرە بکن. ئەم وەکە پارتییا وەلاتپارێزێن کوردستانێ، خوە بەردەوامییا رێبازا تەشکیلاتا ئازادییێ، بەردەوامییا تێکۆشینا شێخ سەعید، سەیید رزا، ئیحسان نووری پاشا، خالد بەگ و یووسف زییا بەگ و ھەڤالان وان دبینن و ژ بۆ ئارمانجا وانیا کوردستانەکە ئازاد تێدکۆشن.
د سالڤەگەرا 101ێ یا شەھادەتا وان دە، ئەم خالد بەگێ جبری، یوسف زییا بەگ، عەلی رزا بەگ، بەھائەدین بەگ، فایێق بەگ و مەلە عەبدولرەحمانێ شرنەخی و ھەموو شەھیدێن کوردستانێ ب رێزداری ب بیر تینن.
14/4/2026ێ
نڤێسینگەها راگەھاندنێ یا پارتییا وەلاتپارێزێن کوردستانێ (PWK)
