ل مەرەشێ کارەسات: د ئێریشا ل سەر دبستانێ دە 4 کەسان ژیانا خوە ژ دەست دان
ل باژارێ مەرەشێ، د ئەنجاما ئێریشەکە چەکداری یا ل سەر دبستانەکێ دە، کارەساتەکە مەزن روو دا. ل گۆری ئاگاھیێن فەرمی، د ڤێ بوویەرێ دە مامۆستەیەک و 3 خوەندەکار ھاتن کوشتن، 20 کەسێن دن ژی بریندار بوون. ھات راگھاندن کو ئێریشکارێ 14 سالی پشتی چالاکیێ داوی ل ژیانا خوە ئانیە.
پارێزگارێ مەرەشێ، موکەڕەم ئونلوەر، دەربارێ بوویەرا کو ئیرۆ 15ێ نیسانێ قەومی دە داخویانیەک دا و پشتراست کر کو د ئەنجاما گولەبارانا بێسەرووبەر دە 4 کەسان ژیانا خوە ژ دەست دانە. ئونلوەر دیار کر کو د ناڤ 20 برینداران دە رەوشا ھنەک خوەندەکاران گرانە و ل نەخوەشخانەیێن باژێر دەرمانکرنا وان د بن چاڤدێریا پزیشکی دە بەردەوام دکە.
ل گۆری لێکۆلینێن دەستپێکێ، ئێریشکار خوەندەکارێ پۆلا 8ێ یێ ھەمان دبستانێیە. ھات تەسپیتکرن کو گومانبارێ 14 سالی ب ئامادەکارییەکە مەزن، ب 5 چەکان و 7 ساجووران کەتیە ئاڤاھیێ دبستانێ. ھات راگھاندن کو ئێریشکار راستەراست دو پۆلێن پۆلا 5ێ ئارمانج گرتنە و پشتی ئێریشێ ب چەکەکێ داوی ل ژیانا خوە ئانیە.
پشتی ڤی نووچەیێ کو ترکیە ھەژاند، رایەدارێن پایەبلند کەتن تەڤگەرێ. وەزیرێ کارێن ناڤخوەیی موستەفا چیفتچی و وەزیرێ پەروەردەھیێ یوسف تەکین، ژ بۆ ژ نێز ڤە لێکۆلینکرنا بوویەرێ و پشتگریکرنا مالباتێن قوربانیان بەر ب مەرەشێ ڤە ب رێ کەتن. تێ پایین کو پشتی لێکۆلینان داخویانیەکە بەرفرەھتر ژ بۆ رایا گشتی بێ دایین.
ئەڤ کارەسات تەنێ 24 دەمژمێران پشتی ئێریشەکە دشبهە ڤێ یا ل سێوەرەگا روحایێ روو دا. دوھ ژی ل سێوەرەگێ خۆرتەکی 19 سالی ئێریشی دبستانا خوەیا بەرێ کربوو و مامۆستەیەک کوشتبوو. دوبارەبوونا ڤان ئێریشێن چەکداری د ناڤەندێن پەروەردەھیێ دە، د ناڤ مالبات، خوەندەکار و جڤاکێ دە بوویە سەدەما نیگارانیەک مەزن و نیقاشێن ل سەر ئەولەھیا دبستانان جارەکە دن ئانی رۆژەڤێ.
