کەرکووک: د ناڤبەرا ئەندامێن یەنەکێ و سەرکرداتیا وان دە کریزا “پارێزگار” دەرکەت

بەریا روونشتنا چاڤەرێکری یا ئەنجوومەنا پارێزگەھا کەرکووکێ، د ناڤ رەفێن یەکیتیا نشتمانی یا کوردستانێ (یەنەکێ) دە ناکۆکیێن کوور دەرکەتن ھۆلێ. ل گۆری زانیاریێن داوی، ئەندامێن ئەنجوومەنێ یێن یەنەکێ ل دژی بریارا پارتیا خوە یا دەربارێ دیارکرنا پارێزگارێ نوو دە ھەلوەستەکە توند نیشان دانە.

ل گۆری ئاگاھیان، ھەر چار ئەندامێن فراکسیۆنا یەنەکێ یێن د ئەنجوومەنا پارێزگەھا کەرکووکێ دە، تەڤی ئەندامێ فراکسیۆنا بابیلۆنێ (کو ئەو بخوە کادرۆیێ یەنەکێ یە)، ل دژی بریارا ناڤەندا پارتیا خوە دەرکەتنە. سەدەما سەرەکەیا ڤێ ناکۆکیێ ئەوە کو سەرکردەتیا یەنەکێ ل سەر بەربژارێ ئەنیا ترکمەنی، محەمەد سەمان ئۆغلوو، ل ھەڤ کریە کو ببە پارێزگار، لێ ئەندامێن ئەنجوومەنێ ڤێ لھەڤکرنێ قەبوول ناکن.

ھات راگھاندن کو ڤان ئەندامان پەیامەکە توند ئاراستەیی سەرۆکێ یەنەکێ و سەرکرداتیا پارتیا خوە کرنە. د پەیاما وان دە ب زەلالی ھاتیە دیارکرن کو ئەو ب تو ئاوایی ئامادە نینن دەنگێ خوە بدن بەربژارێ نھایێ ئەنیا ترکمەنی و داخوازا گوھەرتنا وی دکن. ئەڤ سەرھلدانا ناڤخوەیی، پلانێن سەرکردەتیا یەنەکێ یێن ژ بۆ روونشتنا ئەنجوومەنێ رووبروویی ئاستەنگیێن مەزن کریە.

ھوورگلیێن سیاسی نیشان ددن کو د ناڤبەرا سەرۆکێ بەرێ یێ پارلامەنتۆیا ئیراقێ محەمەد حەلبووسی و سەرکردەتیا یەنەکێ دە لھەڤکرنەک پێک ھاتیە دا کو پۆستا پارێزگارێ کەرکووکێ بدن پێکھاتەیا ترکمەن. تەڤی کو سەرکردەتیا یەنەکێ ھەتا ڤێ گاڤێ ھەول ددە ئەندامێن خوە رازی بکە داکو پابەندی ڤێ پەیمانا سیاسی بن، لێ ھەتا نھا چ نیشانێن رازیبوونێ ژ ئالیێ ئەندامێن ئەنجوومەنێ ڤە نەھاتنە دیتن.

ئەنجوومەنا پارێزگەھا کەرکووکێ ب نڤیسارەکە فەرمی یا ب ھەژمارا م/232 ئیررۆ رۆژا چارشەمی راگھاند کو روونشتن دێ سبە دەمژمێر د 12:00 دە برێڤە بچە. چاڤێن ھەموو ئالیان ل ڤێ روونشتنێ نە کو گەلۆ دێ ناکۆکیێن ناڤخوەیی یێن یەنەکێ وەرن چارەسەرکرن ئان دێ روونشتن بێ ئەنجام بمینە.