سەرۆک بارزانی: “دڤێ کەرکووک ببە نموونەیا براتی و پێکڤەژیانێ”
سەرۆک مەسعوود بارزانی د ھەڤدیتنەکێ دە لگەل کۆنسولێ گشتی یێ رووسیایێ ل ھەولێرێ، پەیامێن گرینگ دەربارێ پاشەرۆژا کەرکووکێ و رەوشا سیاسی یا ھەرێمێ دە دان. بارزانی ب توندی ل دژی “پەیمانێن گومانبار” دەرکەت و داخوازا پاراستنا ئیرادەیا خەلکێ کەرکووکێ کر.
رۆژا پێنجشەمێ، 16ێ نیسانا 2026ێ، سەرۆک مەسعوود بارزانی پێشوازیا کۆنسولێ گشتی یێ رووسیایێ، ماکسیم روبین کر. د ھەڤدیتنێ دە، کۆنسولێ رووسیایێ تەکەزی ل سەر پەیوەندیێن کوور و دیرۆکی یێن د ناڤبەرا وەلاتێ خوە و ھەرێما کوردستانێ دە کر. روبین دەستنیشان کر کو رووسیا گرینگیەکە مەزن ددە پێگە و باندۆرا سەرۆک بارزانی یا د ناڤچەیێ دە و داخوازا وەلاتێ خوەیا ژ بۆ بھێزکرنا پەیوەندیێن ھەردو ئالیان نیشان دا.
سەرۆک بارزانی د دەما ھەڤدیتنێ دە بال کشاند سەر ناکۆکیێن ل ھەرێمێ و دیار کر کو ھەرێما کوردستانێ تو جاری ئالیگرێ شەر و ئالۆزییان نەبوویە. بارزانی گۆت: “ئەم باوەر دکن کو چ پرسگرێک ب شەر و پەڤچوونان نایێن چارەسەرکرن؛ دڤێت ھەموو گرێک ب رێیا دیالۆگ و دیپلۆماسیێ بێن ڤەکرن.” سەرۆک بارزانی ھەر وھا ئانی زمان کو تەڤی ڤێ ھەلوەستا ئاشتیانە، ب ئێریشێن مووشەکی و درۆنی “زولمەکە مەزن” ل ھەرێمێ ھاتیە کرن و وەلاتی بوونە قوربانی.
دەربارێ رەوشا پارێزگەھا کەرکووکێ دە، سەرۆک بارزانی ھەلوەستەکە زەلال نیشان دا و گۆت: “دڤێت کەرکووک ببە باژارەکی کو ببە نموونەیا پێکڤەژیان و براتیا پێکھاتەیان.” بارزانی ب تایبەتی بال کشاند سەر ھەولێن سیاسی یێن ل بەغدایێ و ب توندی ل دژی وان دەرکەت و راگهاند، “ئەم ب تو ئاوایی قەبوول ناکن کو ب رێیا درێژکرنا ‘سەفەقاتێن گومانبار’ یێن ھۆتێل رەشید، لیستک ب ئیرادەیا دەنگدەران و چارەنڤیسا کەرکووکیان بێ کرن.”
سەرۆک بارزانی د داویا ئاخافتنا خوە دە ئانی زمان کو پارتیا دەمۆکراتا کوردستانێ (پەدەکە) ھەر دەم پارێزڤانا مافێن ھەموو پێکھاتەیان بوویە. بارزانی دیار کر کو وان گەلەک جاران ژ بۆ بەرژەوەندیا پێکھاتەیێن دن و پاراستنا ئارامیێ، مافێن خوە و دەستکەفتێن خوە فەدا کرینە، لێ ئەو دێ رێ نەدن کو مافێن رەوایێن گەلێ کورد وەرن بنپێکرن.
