مەسروور بارزانی: ئەم پابەندی پاراستنا ئازادیا رۆژنامەڤانیێ نە
سەرۆکوەزیرێ ھەرێما کوردستانێ مەسروور بارزانی پەیامەک ب بۆنەیا سالڤەگەرا دەرچوونا یەکەمین رۆژنامەیا کوردی و رۆژا رۆژنامەگەریا کوردی، بەلاڤ کر و تێ دە پشتگریا حکوومەتێ بۆ ئازادیا راگھاندنێ دوبارە کر.
سەرۆکوەزیر مەسروور بارزانی، ب بۆنەیا 22یێ نیسانێ، رۆژا رۆژنامەگەریا کوردی و 126ەمین سالڤەگەرا دەرچوونا رۆژنامەیا “کوردستان” کو ژ ئالیێ میر مقداد مدحەت بەدرخان ڤە ھاتبوو وەشاندن، پەیامەکە پیرۆزباھیێ ئاراستەیی ھەموو رۆژنامەڤانێن کوردستانێ کر.
مەسروور بارزانی ھەروھا د پەیاما خوە دە سالڤەگەرا دامەزراندنا سەندیکایا رۆژنامەڤانێن کوردستانێ ژی پیرۆز کر و ھێڤیا سەرکەفتنێ ژ بۆ کەدکارێن ڤێ قادێ خوەست.
پەیاما سەرۆکوەزیر مەسروور بارزانی:
ب بۆنەیا رۆژا رۆژنامەگەریا کوردی و دەرچوونا یەکەم ھەژمارا رۆژنامەیا (کوردستان) ژ ئالیێ میر مقداد مدحەت بەدرخان ڤە، کو د ھەمان دەمێ دە سالڤەگەرا دامەزراندنا سەندیکایا رۆژنامەڤانێن کوردستانێ یە، ئەز پیرۆزباھیێ ل ھەموو رۆژنامەڤانێن کوردستانێ و ئەندامێن سەندیکایا رۆژنامەڤانان دکم و ھێڤیا سەرکەفتن و پێشکەفتنا زێدەتر ژ بۆ وان دخوازم.
حکوومەتا ھەرێما کوردستانێ وەک ھەر دەم، پابەندە ب پاراستن و بەرەڤانیکرنا ل ئازادیا کارێ راگھاندن و رۆژنامەڤانیێ و پێشکێشکرنا ھێسانکاریێن پێویست ژ بۆ راگھاندنکاران. د ھەمان دەمێ دە، ئەم ھێڤیدارن کو راگھاندنکارێن ھێژا ژی د ئاستا پیشە و ئەرکێ گرینگا راگھاندنێ دە بن و ب شێوەیەکی پیشەیی و بەرپرسیارانە کارێن خوە ئەنجام بدن؛ یاسا، ئەتیک و پیڤانێن ناڤنەتەوەیی یێن رۆژنامەڤانیێ ل بەر چاڤان بگرن و رۆلا خوەیا چالاک د ھشیارکرنا جڤاکێ، بەرەڤانیکرنا ل دەستکەفتێن نشتمانی، چاندا پێکڤەژیانا ئاشتیانە و قەوارەیا دەستوورییا ھەرێما کوردستانێ دە بگرن.
رۆژا رۆژنامەگەریا کوردی ل ھەموو راگھاندنکارێن کوردستانێ پیرۆز بە.
رۆژا رۆژنامەگەریا کوردی
رۆژا 22ێ نیسانێیا ھەر سالێ وەک رۆژا رۆژنامەگەریا کوردی ھاتیە دیارکرن. ئەڤ یەک ڤەدگەرە سالا 1898ان، دەما کو مقداد مدحەت بەدرخان یەکەم ھەژمارا رۆژنامەیا “کوردستان” ل باژارێ قاھیرەیا پایتەختا مسرێ چاپ و بەلاڤ کر.
ئەڤ رۆژنامە ھەتا سالا 1902ان بەردەوام کر و 31 ھەژمار ژێ دەرکەتن. ھەژمارێن وێ ل چار باژارێن جودایێن وەکی قاھیرە، جنێڤ، لهندهن و فۆلکەستۆنە ھاتن چاپکرن. ھەر وھا رۆژا 22ێ نیسانێ سالڤەگەرا دامەزراندنا سەندیکایا رۆژنامەڤانێن کوردستانێ یە کو د سالا 1998ان دە ل باژارێ ھەولێرێ ھاتبوو دامەزراندن.
