مەسروور بارزانی پیرۆزباھیا عهلی زەیدی دکە
سەرۆکوەزیرێ ھەرێما کوردستانێ د پەیوەندیەکە تەلەفۆنی دە پیرۆزباھی ل عهلی زەیدی، کو ژ بۆ پۆستا سەرۆکوەزیرێ فەدەرالێ ئیراقێ ھاتیە ئەرکدارکرن. مەسروور بارزانی ھەروەسا پشتگریا حکوومەتا ھەرێما کوردستانێ ژ بۆ سەرکەفتنا کابینەیا نوو و چارەسەرکرنا ئارێشەیان ل سەر بنگەھا دەستوورێ دیار کر.
سەرۆکێ حكوومهتا ھەرێما کوردستانێ مەسروور بارزانی ئیرۆ (سێشەم، 28ێ نیسانا 2026ێ) ل سەر حەسابێ خوەیێ فەرمی یێ تۆرا جڤاکی “X”ێ راگھاند کو، ئەو ب رێیا تەلەفۆنێ لگەل سەرۆکوەزیرێ راسپاردی یێ ئیراقێ عهلی زەیدی ئاخفتیە.
مەسروور بارزانی د پەیاما خوە دە نڤیساندیە: “مە پیرۆزباھی ل عهلی زەیدی کر، ژ بەر راسپاردنا وی ژ بۆ پۆستا سەرۆکوەزیرێ فەدەرال؛ مە ھێڤیا سەرکەفتنێ د ئەرکێ وی یێ پێکانینا کابینەیا نوویا حكوومهتا فەدەرال دە ژ وی رە خوەست.”
سەرۆکوەزیرێ ھەرێما کوردستانێ تەکەز ل سەر گرنگیا پابەندبوونا ب دەستوورێ کر و راگھاند: “مە پشتگریا خوە ژ بۆ چارەسەرکرنا ھەمی ئارێشەیان ل سەر بنگەھا دەستوورێ نیشان دا.”
مەسروور بارزانی ھەروەسا ھێڤیا خوە ئانی زمان کو ئەڤ پێنگاڤ ببە دەستپێکا قۆناغەکە نوو ل ئیراقێ و گۆت: “ئەم ھێڤیدارن سەردەمەکە تژە ئاشتی و تەناھی ل ئیراقێ دەست پێ بکە.”
ئەڤ پەیوەندیا تەلەفۆنی پشتی وێ یەکێ ھات کو عهلی زەیدی وەکی بەربژارێ یەکدەنگیێ یێ چارچۆڤەیا ھەڤاھەنگیێ ھات دیارکرن و ژ ئالیێ سەرۆککۆمار ڤە ب رەنگەکی فەرمی ژ بۆ پێکانینا حكوومهتا بێ یا ئیراقێ ھات ئەرکدارکرن.
