سەرۆک بارزانی پیرۆزباھی ل سەرۆکوەزیرێ راسپاردی عەلی زەیدی کر

سەرۆک مەسعوود بارزانی، ب ھەلکەفتا راسپارتنا وی ژ بۆ پۆستا سەرۆکوەزیرتیا ئیراقێ، پیرۆزباھی ل عەلی زەیدی کر. بارزانی د پەیاما خوە دە بال کشاند سەر گرنگیا ڤێ گاڤا سیاسی و ھێڤی خوەست کو ئەڤ گوھەرتن ببە سەدەما چارەسەرکرنا کریزێن وەلات.

ئیرۆ، سێشەم 28ێ نیسانا 2026ێ، سەرۆک مەسعوود بارزانی و سەرۆکوەزیرێ راسپاردی یێ ئیراقێ عەلی زەیدی ب رێیا تەلەفۆنێ ئاخڤین. ل گۆری داخویانیا بارەگەھا بارزانی، سەرۆک بارزانی د ڤێ پەیوەندیێ دە ب گەرمی پیرۆزباھی ل زەیدی کریە و د ئەرکێ وی یێ نوو و گران دە ھێڤیا سەرکەفتنێ ژێ رە خوەستیە.

سەرۆک بارزانی د دەما ئاخافتنا خوە دە دەستنیشان کر کو راسپارتنا عەلی زەیدی ژ بۆ ڤێ پۆستێ، د ڤێ قۆناغا حەساس دە خوەدی گرنگیەکە تایبەتە. بارزانی دیار کر کو ئەڤ یەک “دەرفەتەکە زێرینە” داکو پێڤاژۆیا سیاسی یا ئیراقێ جارەکە دن ڤەگەرە سەر رێگەیا خوەیا راست و عەدالەت و ئارامی ل وەلات پەیدا ببە.

ئەڤ پەیوەندیا تەلەفۆنی پشتی وێ یەکێ ھات کو رۆژا دوشەمێ، 27ێ نیسانا 2026ێ، ب رەنگەکی فەرمی عەلی زەیدی وەکی بەربژارێ سەرکەفتی ژ بۆ وەرگرتنا پۆستا سەرۆکوەزیرتیا ئیراقێ ھات دیارکرن. تێ پایین کو د رۆژێن پێش دە زەیدی دەست ب گۆتووبێژان بکە ژ بۆ پێکانینا کابینەیا خوەیا نوو، کو چاڤێن ھەموو ئالیێن ناڤخوەیی و ناڤدەولەتی ل سەر ڤێ پرۆسەیێ نە.