مەزلووم عەبدی: چ پێشنیارەک ژ بۆ وەرگرتنا پۆستەکێ بلند ل شامێ نەگھشتیە من
فەرماندارێ ھێزێن سووریا دەمۆکراتیک (ههسهدێ)، مەزلووم عهبدی د ھەڤپەیڤینەکە بەرفرەھ دە بەحسا تێکلیێن ب شامێ رە، کێماسیێن رێڤەبەریا خوە و پاشەرۆژا ھێزێن خوە کر.
مەزلووم عهبدی د ھەڤپەیڤینا ب پۆدکاستا (ب دەما شامێ) دە کو بریارە د نێز دە ل سەر پلاتفۆرما “مازێژ” بێ وەشاندن، دیار کر کو سەرۆکێ سووریێ ئەحمەد شەرع یان حکوومەتێ “ب ئاوایەکی راستەراست” وەزیفەیەکە بلند یان ژی پۆستەک د نڤیسگەھا سەرۆکاتیێ دە پێشنیاری وی نەکریە.
لێ بەلێ، دەما کو ژێ ھات پرسین “گەلۆ ب ئاوایەکی نەراستەراست پێشنیارەک وھا ھاتیە کرن؟”، عهبدی ب بێدەنگیەکێ بەرسڤ دا، کو ئەڤ ژی وەکی “ئەرێ” ھات نرخاندن.
دەربارێ کۆنفەرانسا ل حەسەکێ دە کو ب بەشداریا کەسایەتیێن دورزی وەک شێخ غەزال غەزال و شێخ حکمەت ھجری لدار کەتبوو، نەخاسمه کو پشتی پێوەندیا تەلەفۆنییا د ناڤبەرا عهبدی و شەرع دە پێک ھاتبوو، فەرماندارێ ههسهدێ گۆت: “دبە کو ئەڤ کۆنفەرانس پێک نههاتبا، لێ پێک ھات؛ ب دیتنا من نە پێویست بوو کو تشتەکی وھا ببە.”
عهبدی ھەروھا دەستنیشان کر، د شەرێ ل دژی داعشێ دە ھێزێن ههسهدێ نە تەنێ بوون و ئالیێن دن ژی د ڤی شەری دە جھ گرتنە.
مەزلووم عهبدی د بەشەکە دن یا ئاخافتنا خوە دە ل سەر مژارا مادەیێن ھشبهر ل ھەرێمێن بن کۆنترۆلا وان یێن بەرێ (باکور و رۆژھلاتێ سووریێ) ل خوە مکور ھات و گۆت: “ئەم د تێکۆشینا ل دژی قاچاخچیتی و بەلاڤبوونا مادەیێن ھشبەر دە، ل ھەرێمێن خوە نە سەرکەفتی بوون.”
مەزلووم عهبدی و ئەحمەد شەرع د 10ێ ئادارا 2025ان دە پەیمانەک ئیمزە کربوون. ل گۆری وێ پەیمانێ، بریار ھاتبوو گرتن کو ههسهده تەڤلی ناڤ ئارتێشا سووریەیێ ببە و ھەموو سازیێن سڤیل و لەشکەری (دەرگەھێن سینۆری، فرۆکخانە، بیرێن پەترۆل و گازێ) رادەستی دەولەتێ بێن کرن. ھەروھا د پەیمانێ دە ھاتبوو قەبوولکرن کو کورد وەکی پێکھاتەیەکە رەسەن یا سووریەیێ بێن ناسکرن و مافێن وان یێن دەستووری بێن پاراستن.
تەڤی کو ئەڤ پەیمان ژ بۆ دەمەکێ راستی ئاستەنگیان ھات و بوو سەدەما ئالۆزی و شەرێ ناڤبەرا ئارتێش و ههسهدێ، لێ د چلەیا 2026ان دە ئاگربەستەکە نوو ھات ئیمزەکرن. ب ڤێ ئاگربەستێ رە ههسهدێ بنکەیێن خوە رادەستی ھێزێن حکوومەتێ کرن. ب ڤێ یەکێ رە، ب ئاوایەکی پراتیکی داوی ل تشتێ کو ژێ رە “رێڤەبەریا خوەسەر” دھات گۆتن ھات و دەولەتا سووریەیێ سەروەریا خوە ل سەر ھەرێمێن باکور و رۆژھلاتێ وەلات جارەکە دن چەسپاند.
