پارتیا وەلاتپارێزێن کوردستانێ: “دڤێت دەولەت ب فەرمی ژبەر جینۆسایدا دێرسمێ لێبۆرینێ بخوازە”

نڤێسینگەها راگھاندنێیا پارتیا وەلاتپارێزێن کوردستانێ (PWK)، ب بۆنەیا سالڤەگەرا 89ێ یا دەستپێکرنا جینۆسایدا دێرسمێ داخویانیەک بەلاڤ کر. PWK د داخویانیا خوە دە تەکەز کر کو کۆمکوژیا سالا 1937ێ نە بوویەرەکە ئاسایی، لێ بەلێ خەلەکەک ژ سیاسەتا سیستەماتیکا تونەکرنا ملەتێ کوردە.

د داخویانیێ دە ھات ب بیر خستن کو د 4ێ گولانا 1937ێ دە، ب پەژراندنا مستەفا کەمال ئاتاتورک و فەوزی چاکماک، “بریارا ھەیەتا وەزارەتێ یا تەڤگەرا تەنقیل” ھاتە ستەندن. ل گۆری ڤێ بریارێ، ئارمانج نە تەنێ تەپساندنا سەرھلدانەکێ، لێ بەلێ “ژ بنی دە راکرنا” تفک و چاڤکانیێن گەلێ کورد، وێرانکرنا گوندان و دەربەدەرکرنا مالباتێن کورد بوو. PWK دەستنیشان کر کو ئەڤ فەرمان، فەرمانا ژھۆلۆراکرنا ملەتێ کورد بوو.

پارتییا وەلاتپارێزێن کوردستانێ بال کشاند سەر ھۆڤیتیێن د وێ دەمێ دە و دانپێدانێن رایەدارێن دەولەتێ یێن وەکی ئیحسان سەبری چاگلایانگیل ب بیر خستن. د داخویانیێ دە ھات گۆتن: “ژن و زارۆکێن کو رەڤییابوون شکەفتان، ب ژەھرا مشکان ھاتن قەتلکرن. کەچێن دێرسمێ ژ بۆ نەکەڤن دەستێ لەشکەران خوە ژ زنارێن مونزوورێ ئاڤێتن.” ھەر وھا ھات دیارکرن کو زارۆکێن سێوی ھاتن رەڤاندن و ل باژارێن ترکیەیێ د بن ناسنامەیێن جودا دە ھاتن مەزن کرن داکو ژ کۆکێن خوە وەرن قوتکرن.

د داخویانیا خوە دە پارتیا وەلاتپارێزێن کوردستانێ بانگ ل دەولەتا ترکیەیێ کر کو ل ھەمبەری دیرۆکا خوە رووبروو ببە و ڤان گاڤان باڤێژە:

ژ بەر قرکرن و سووجێن ل دێرسمێ، ب فەرمی لێبۆرینێ بخوازە.

جھێ مەزەلێن رێبەرێن کورد سەید رزا، شێخ سەعید و زانیارێ کورد سەعیدێ نوورسی ئەشکەرە بکە.

مافێن نەتەوەیی و دیرۆکی یێن گەلێ کورد ناس بکە.

د داویا داخویانیێ دە، پارتییا وەلاتپارێزێن کوردستانێ ھەموو شەھیدێن دێرسمێ و کوردستانێ ب رێزداری ب بیر ئانین و راگھاند کو تێکۆشینا وان دێ رێیا ئازادی و دەمۆکراسیێ رۆھنی بکە.