پەدەکە-سێ و یەکیتیا خوەندەکاران ل عەفرینێ میھریجانەکە چاندی لدار خست
رێخستنێن عەفرین و حەلەبێ یێن پارتیا دەمۆکراتا کوردستانێ – سووریا (پەدەکە-سێ)، لگەل یەکیتیا خوەندەکار و جوانێن دەمۆکراتێن کوردستانی، دوھ 8ێ گولانێ ب مەبەستا پاراستنا ناسنامەیا نەتەوەیی میھریجانەکە بھاری یا بەرفرەھ ل بەر گۆلا مەیدانکێ یا عەفرینێ ئۆرگانیزە کرن. ئەڤ چالاکی ب بەشداریا گرسەیا خوەندەکاران و مالباتێن کوردێن ھەرێمێ برێڤە چوو.
میھریجان ب سروودا نەتەوەیی یا “ئەی رەقیب” دەست پێ کر و ب سترانێن رەسەن و گۆڤەندێن فۆلکلۆری یێن تایبەت ب ھەرێما عەفرینێ بەردەوام کر. ئارمانجا سەرەکی یا ڤێ چالاکیێ ئەو بوو کو جوان و خوەندەکارێن کورد ب رەھ و کۆکێن چاندا خوە ڤە وەرن گرێدان و پەیوەندیێن براتی و جڤاکی د ناڤبەرا مالباتێن ھەرێمێ دە ھین خورتر ببن.
د چارچۆڤەیا بەرنامەیێ دە، بەرپرس و نوونەرێن ئالیێن ئامادە چەندین ئاخافتن پێشکێش کرن. د ڤان گۆتاران دە بال ھات کشاندن سەر گرنگیا پاراستنا میراتا چاندی یا کوردی، پشتگریکرنا خوەندەکاران د وارێ پەروەردەھیێ دە و ئاڤاکرنا پرەکە خورتا دانوستاندنێ د ناڤبەرا پێکھاتەیێن کوردێن ل ھەرێمێ دە.
میھریجانا بھاری ب خوەندنا چەندین ھەلبەستێن نشتمانی ژ ئالیێ خوەندەکاران ڤە ب داوی بوو. ئەڤ میھریجان ژ بۆ مالباتێن کوردێن ل عەفرینێ بوو دەرفەتەکە گرنگ یا نێزکبوونا جڤاکی و خورتکرنا مۆرالێ د ئاتمۆسفەرەکە ئارام و ھونەری دە.
