پێڤاژۆیا دادگەھکرنا ھەڤسەرۆکێ بەرێ یێ یەنەکێ لاھوور شێخ جەنگی و ئالیگرێن وی راستی راگەشیەکە توندا ئەولەھی تێ. ل گۆری زانیاریێن نوو، ئاساییشا سلێمانیێ ب ناڤێ سەرۆکێ یەنەکێ بافل تالەبانی گەف ل تیما پارێزەرێن بەرەڤانیێ کرنە. ھەڤدەم پارێزەران دەربارێ ژیانا گرتیەکی د بن ئیشکەنجەیێ دە ھشیاریەکە توند دان.
یەک ژ پارێزەرێن دۆسیەیێ، کو نەخوەست ناڤێ وی وەرە ئەشکەرەکرن، ژ کوردستان24ێ رە راگھاند کو پشتی روونشتنا دادگەھێیا پێنجشەما بۆری (14ێ گولانا 2026ێ)، ئاساییشێ ب رێیا پەیوەندیا تەلەفۆنی گەف ل چار پارێزەران و مالباتێن وان کریە. د گەفان دە ھاتیە دیارکرن کو ئەگەر د روونشتنا بێ دە مینا یا بۆری سەرەدەریێ بکن، دێ رووبروویی بەرپرسیاریەکە گران ببن.
ھەڤدەم لگەل ڤان گەفان، تیما پارێزەران داخوازنامەیەکە بلەز ئاراستەیی دەزگەھێن بلندێن ھەرێما کوردستانێ و کۆنسولخانەیێن بیانی کر. د داخویانیێ دە ھات ئەشکەرەکرن کو پێشمەرگەیەکی لاھوور شێخ جەنگی یێ ب ناڤێ (حەمە رەش)، د دەما 9 مەھێن گرتنا خوە دە ل سلێمانیێ، رووبروویی توندترین ئیشکەنجەیا لاشی و دەروونی بوویە.
ل گۆری یاداشتا پارێزەران، د بن ئیشکەنجەیێ دە سەرێ حەمە رەش ھاتیە شکاندن، پشتا وی ب کێران ھاتیە بریندارکرن، ددانێن وی ھاتنە دەرخستن و زرارێن ھەردەمی گھاندنە لاشێ وی. پارێزەران ئەڤ رەفتار وەکی “بزاڤەک بۆ شکاندنا روومەتێ و کێمەندامکرنا ھەردەمی” وەسف کر و داخوازا دەستتێوەردانا پزیشکی و قانوونی یا ناڤدەولەتی کر.
