سەرۆککۆماریا ترکیەیێ كۆمبوونا ل گهل مەسروور بارزانی وەکی «وەستگەھا گرنگ» یا حهفتیێ نیشان دا
فەرمانگەھا سەرۆککۆماریا ترکیەیێ، کورتەیا ھەری گرینگ یا چالاکی و ھەڤدیتنێن دیپلۆماتیک یێن حەفتەیا بۆری یێن سەرۆککۆمار رەجەپ تاییپ ئەردۆگان بەلاڤ کر. د ناڤ ڤان خەباتان دە، ھەڤدیتنا ب سەرۆکوەزیرێ ھەرێما کوردستانێ مەسروور بارزانی رە وەکی یەک ژ وەستگەھێن ھەری گرنگ یێن ھەفتەیێ ھات دەستنیشانکرن.
سەرۆککۆماریا ترکیەیێ ئیرۆ 11ێ گولانا 2026ان، ل سەر پلاتفۆرما “X”ێ ڤیدیۆیەک بەلاڤ کر کو تێ دە گرنگترین دیدارێن دیپلۆماتیک يێن ئەردۆگان يێن 7 رۆژێن بۆری ھاتنە کۆمکرن. ھەڤدیتنا رۆژا 9ێ گولانێ یا ل گەل مەسروور بارزانی ل قەسرا دۆلماباھچەیێ، د لیستەیا سەرەدانێن ئاستا بلند دە، وەکی خالەکە سەرەکە جھ گرت.
سەرۆکوەزیر مەسروور بارزانی رۆژا 9ێ گولانێ ب سەردانەکە فەرمی گھیشتبوو ستەنبۆلێ و ل کۆشکا دۆلماباھچەیێ ژ ئالیێ ئەردۆگان ڤە ھاتبوو پێشوازیکرن. د جڤینێ دە، وەزیرێ دەرڤە ھاکان فيدان، وەزیرێن ئەنەرژی و بەرەڤانیێ و بەرپرسێ ھەوالگيریا ترکیەیێ (میتێ) ژی ئامادە بوون.
ھەر دو ئالیان تەکەزی ل سەر بھێزکرنا پەیوەندی و ھەڤاھەنگیا د ناڤبەرا ترکیە و ھەرێما کوردستانێ دە کرن. سەرۆکوەزیر مەسروور بارزانی پەسنێ رۆلا ئەردۆگان و ترکیەیێ یا د پاراستنا ئاشتیا ناڤچەیێ دە دا. ژ ئالیێ خوە ڤە، سەرۆککۆمار ئەردۆگان ژی ھەرێما کوردستانێ وەکی “فاکتۆرەکە گرینگ یا ئاشتی و ئارامیا ناڤچەیێ” پێناسە کر.
د بەشەکە دن یا جڤینێ دە، ئاڤاکرنا کابینەیا نوویا حکوومەتا ئیراقێ ھات گۆتووبێژکرن. ھەر دو ئالیان ھێڤی خواست کو حکوومەتا نوویا بەغدایێ، ببە سەدەما ئارامیا ئیراقێ و کێشەیێن ھەولێر و بەغدایێ ل سەر بنگەھا دەستوورێ وەرن چارەسەرکرن.
خالەکە دن یا گرنگا ھەڤدیتنێ “پێڤاژۆیا ئاشتیێ” و مژارا چەکدانینا پهكهكێ بوو. سەرۆکوەزیر مەسروور بارزانی پشتگریا ھەرێما کوردستانێ ژ بۆ ڤێ پێڤاژۆیێ دوبارە کر. سەرۆککۆمار ئەردۆگان ژی تەکەزی ل سەر گرنگیا بەردەوامبوون و سەرخستنا ڤێ پێڤاژۆیێ کر، دا کو ئەنجامێن ئاشتیانە ژێ دەرکەڤن.
