مەزلووم عەبدی: لەیلا قاسم سەمبۆلا روومەت و بەرخوەدانا ژنا کوردە
فەرماندارێ گشتی یێ ھێزێن سووریەیا دەمۆکراتیک (ھەسەدێ)، مەزلووم عەبدی، د سالڤەگەرا 52یێ یا شەھیدبوونا پێشەنگا شۆرەشگەر لەیلا قاسم دە پەیامەک وەشاند. عەبدی د پەیاما خوە دە بال کشاند سەر رۆلا دیرۆکی یا ژنێن کورد د پاراستنا روومەتا نەتەوەیی دە و سۆزا بەردەوامیا تێکۆشینێ نوو کر.
فەرماندارێ گشتی یێ ھەسەدێ، مەزلووم عەبدی، ئیرۆ (سێشەمێ، 12ێ گولانا 2026ێ) ب رێیا حەسابا خوە یا فەرمی یا مەدیایا جڤاکی Xێ، رێز و حورمەتا خوە ژ بۆ “بووکا کوردستانێ” ئانی زمان. عەبدی دەستنیشان کر کو لەیلا قاسم، وەکی کەچەکە قەھرەمان یا باشوورێ کوردستانێ، ب ئیرادەیەکا پۆلات میناکا سەرفرازیا ژنێن کورد ل جیھانێ نیشان دایە.
مەزلووم عەبدی د پەیاما خوە دە تەکەز کر کو لەیلا قاسم و ھەڤالێن وێ ب فەداکاریا خوە روومەتا گەلێ کورد پاراستنە. عەبدی گۆت: “ئەم ئیرۆ ب رێزداری لەیلا قاسم و ھەموو ژنێن پێشەنگێن کو د ریا ئازادیێ دە جانێ خوە فەدا کرنە، ب بیر تینن. تێکۆشینا مەیا ژ بۆ ئازادیێ، دێ ھەر تم ل سەر شۆپا ڤان لەھەنگان ب بریارداری بەردەوام بکە.”
لەیلا قاسم، کو د 12ێ گولانا 1974ێ دە ژ ئالیێ رەژیما بەعس یا ئیراقێ ڤە ھات سێدارەدان، د دیرۆکا کوردستانێ دە وەکی یەکەمین ژنا کورد یا کو ژ بۆ دۆزا نەتەوەیی ھاتە سێدارەدان تێ ناسکرن. ئەو ب جەسارەتا خوە یا ل بەر سێدارێ و ب خەباتێن خوەیێن د ناڤا تەڤگەرا خوەندەکارێن کوردستانێ دە، بوویە سەمبۆلا بەرخوەدانا ژنێ و ناسنامەیا ئازادیێ.
