ئاک پارتی: ھەتا کو پهكهكه چەکان نهدانه گاڤێن یاسایی ناهێن هاڤێتن
د لژنەیا گشتییا پارلامەنتۆیا ترکیەیێ دە، پێشنیارا ئۆپۆزسیۆنێ ژ بۆ نیقاشکرنا گاڤێن یاسایی یێن پێڤاژۆیا چارەسەریێ ھات گۆتووبێژکرن، ئۆپۆزسیۆنێ داخواز کر کو حکوومەت دەملدەست گاڤێن یاسایی یێن پێڤاژۆیێ باڤێژە.
لێ ئاک پارتیێ جارەکە دن تەکەز کر کو مەرجێ وان یێ بنگەھین یێ ژ بۆ دەرخستنا یاسایان دانینا چەکان یا پهكهكهیێ یە.
پارلامەنتۆیا ترکیەیێ دوهـ ل سەر پێشنیارا پارتیا یەن یۆلێ یا ژ بۆ نرخاندنا قۆناغا داوی یا پێڤاژۆیا چارەسەریێ و گاڤێن یاسایی جڤیا.
لێ د ناڤبەرا دەستھلات و ئۆپۆزسیۆنێ دە ل سەر “رێباز و دەما” گاڤان ناکۆکی دەرکەتن.
وەکیلێ سەرۆکێ کۆما پارتیا یەن یۆلێ بولەنت کایا داخواز کر کو خالێن راپۆرا کۆمیسیۆنا پارلامەنتۆیێ یێن دەربارێ گاڤێن یاسایی دە دەملدەست بکەڤن وارێ بجهئینانێ.
کایا رەخنە ل ھەلوەستا حکوومەتێ یا دەربارێ پێڤاژۆیێ دە گرتن و گۆت: ئەم گرێدانا گاڤێن دەمۆکراتیک یا ب مەرجێ دانینا چەکان رە راست نابینن. دڤێ بریارێن دادگەھا دەستوورا بنگەھین و دادگەھا مافێن مرۆڤان یا ئەورۆپایێ وەرن بجھئانین و سیستەما قەیوومان ب داوی ببە. ئەڤ مافێن مرۆڤی نە و نابە کو وەکی ئاموورەکە بازرگانیێ وەرن بکارانین.
داخوازیێن دەم پارتی و جهههپێ
ل ئالیێ دن پارلامەنتەرێ دەم پارتیێ ساروھان ئۆلوچ ژی داخواز کر کو د یاسایا ئینفازێ و یاسایا تێکۆشینا ل دژی تەرۆرێ دە سەرەراستکرنێن بلەز وەرن کرن.
پارلامەنتەرێ جهههپێ ئۆکان کۆنورالپ ژی تەکەز کر کو تەڤی ھەموو ئاستەنگیان ژی ئەو دێ ژ بۆ بسەرخستنا ئاشتیێ ھەول بدن.
ل سەر ناڤێ ئاک پارتیێ، سەرۆکێ کۆمیسیۆنا دادێ یا پارلامەنتۆیێ و پارلامەنتەرێ ستەنبۆلێ جونەیت یوکسەل بەرسڤا رەخنەیان دا و ھەلوەستا پارتیا خوە دیار کر.
یوکسەل دەستنیشان کر، ھەتا کو فەسخکرنا رێخستنێ و دانینا چەکان ب ئاوایەکی فەرمی ژ ئالیێ سازیێن دەولەتێ ڤە نەیێ پشتراستکرن ئەو دێ چ گاڤان د وارێ یاسایی دە نەهاڤێژن.
جونەیت یوکسەل گۆت، ئاستا ھەری کریتیک یا ڤێ پێڤاژۆیێ، چەکدانین و فەسخکرنا پهكهكهیێ یە. تەنێ پشتی دەستنیشانکرنا ڤێ یەکێ گاڤێن یاسایی دکارن وەرن ئاڤێتن. ئێدی ژ ڤێ پێڤاژۆیێ ڤەگەر نینە.
