جەنگیز چاندار: ژ بۆ سەرکەفتنا پێڤاژۆیێ دڤێت یاسایێن تایبەت بێنە دەرخستن
پارلامەنتەرێ پارتیا وەکھەڤی و دەمۆکراسیێ یا گەلان (دەم پارتی)یێ دیاربەکرێ جەنگیز چاندار، دەربارێ نیقاشێن ل سەر چارەسەریا پرسگرێکا کورد و “پێڤاژۆیا نوو” دە نرخاندنێن گرنگ کرن. چاندار دەستنیشان کر کو تەڤی ھەموو گومان، دودلی و دەرەنگکەتنان ژی، چارەسەریا ڤێ پرسگرێکێ ئێدی ڤەبژێرکەکە مەجبوورییە و دێ ب ھەر ئاوایی پێک وەرە.
چاندار د داخویانیا خوەیا ژ بۆ مەدیایا ناڤخوەیی دە، بال کشاند سەر قەیرانا کوور و گوھەرتنێن نوویێن ل رۆژھلاتا ناڤین و راگھاند کو شەرێ ئیرانێ بەردەوام بکە یان ژی راوەستە، ئەڤ قەیرانا ھەرێمی ب ھێسانی ب داوی نابە. پارلامەنتەرێ دەم پارتیێ دیار کر کو وەلاتێن وەکی ترکیە، ئیراق، سووریە و ئیران ئێدی نکارن بێیی کوردان پێنگاڤان باڤێژن و کورد ل ڤان وەلاتان بەر ب بوون تفاق و ھەڤبەشێن دەستھلاتێ ڤە دچن.
دەربارێ برێڤەچوونا “پێڤاژۆیا ئاشتیێ” دە، جەنگیز چاندار پشتراست کر کو ھەر چەند پرۆسە ھێدی بمەشە ژی، لێ گاڤێن ل پشت پەردەیێ بەردەوام دکن. چاندار دەستنیشان کر کو ژ بۆ گھیشتنا ئەنجامەکە ماییندە، میسۆگەریا حقووقی و ستاتویەکە سیاسی شەرتن و وھا گۆت: “د ڤێ چارچۆڤەیێ دە، دێ رێبەرێ پەکەکێ عەبدوللاھ ئۆجالان ببە خوەدی رۆل و ستاتویەکە جودا. ژ بۆ سەرکەفتنا ڤێ پرۆسەیێ، دڤێت دەملدەست یاسایێن تایبەت بێنە دەرخستن؛ ئەگەر نا، سیستەم ب سەر ناکەڤە.”
پارلامەنتەرێ دەم پارتیێ د بەشا داوییا ئاخافتنا خوە دە بال کشاند سەر مژارا گرنگ یا دانینا چەکان و پاشەرۆژا ئەندامێن رێخستنێ. چاندار دیار کر کو ژ بۆ ڤەگەرا کەسێن کو چەکێن خوە داتینن، پێدڤی ب میکانیزمایەکە یاسایی یا نوو ھەیە و داخواز کر کو “یاسایەکە تایبەت و ڤەگوھێز” ببە بنگەھا میسۆگەرکرنا ڤێ ڤەگەرێ داکو رێ ل بەر نۆرمالبوونا سیاسی ڤەبە.
