پاپایێ ڤاتیکانێ رۆلا ھەرێما کوردستانێ یا د وارێ پاراستنا مەسیحیان دە بلند نرخاند
سەرۆکێ ھەرێما کوردستانێ نێچیرڤان بارزانی، ئیرۆ (18/5/2026ێ) ل ڤاتیکانێ ژ ئالیێ قەداسەتا پاپا لیۆ خیڤ ڤە ھات پێشوازیکرن. ل گۆری داخویانیا سەرۆکاتیا ھەرێما کوردستانێ، پشتی روونشتنا فەرمی، ھەر دو ئالیان ل سەر رەوشا پێکھاتەیان، پەیامێن ئاشتیێ و گەشەدانێن داوی یێن ھەرێمێ جڤینەکە گرنگ پێک ئانین.
د جڤینێ دە، نێچیرڤان بارزانی بال کشاند سەر رەوشا پێکھاتەیێن پرئالی یێن ل ئیراق و ھەرێما کوردستانێ. بارزانی تەکەز کر کو مەسیحی و ھەموو پێکھاتەیێن ئۆلی و نەتەوەیی، پارچەیەکی رەسەن و دانەبرای یێ دیرۆک، چاند و ناسنامەیا نیشتمانی یا ھەرێما کوردستانێ نە و دەستنیشان کر کو ئەڤ پێکھاتە ب ھەڤ رە پاشەرۆژا وەلات ئاڤا دکن.
سەرۆکێ ھەرێما کوردستانێ ھەروھا سپاسیا رۆلا تایبەتا ڤاتیکانێ کر کو ل سەر ئاستا جیھانێ پەیاما ئاشتیێ و دیالۆگێ بەلاڤ دکە. بارزانی د دەما ئاخافتنا خوە دە سەردانا دیرۆکی یا پاپایێ کۆچکری پاپا فرانسیس ژ بۆ کوردستانێ ب بیر خست و ب فەرمی پاپا لیۆ ڤەخواند کو سەردانا ئیراق و ھەرێما کوردستانێ بکە.
ژ ئالیێ خوە ڤە، پاپایێ ڤاتیکانێ پاپا لیۆ کێفخوەشیا خوە ب ڤێ ھەڤدیتنا فەرمی ئانی زمان و پەسنێ چاندا لێبۆرین، پێکڤەژیان و ھەڤدوقەبوولکرنا جڤاکی یا ل ھەرێما کوردستانێ دا. پاپا ب تایبەتی رۆلا ھەولێرێ یا د وارێ پاراستن، حەواندن و ئەولەکرنا ژیانا مەسیحی و کۆچبەران دە، ب تایبەتی د قۆناغێن ھەری دژوار و قەیرانێن ھەرێمی دە، بلند نرخاند.
د بەشا داوی یا جڤینێ دە، نێچیرڤان بارزانی و پاپا لیۆ گوفتووگۆ ل سەر رەوشا گشتی و ئارامیا رۆژھلاتا ناڤین کرن. ھەر دو ئالیان ھێڤیا ئاشتی، ئارامی و سەرفرازیێ ژ بۆ تەڤاھیا مرۆڤاھیێ خوەستن و تەکەزی ل سەر بەردەوامیا پەیوەندیێن دۆستانی یێن ناڤبەرا ڤاتیکان و ھەرێما کوردستانێ کرن.
