پرۆسەیەک نوو د ھێزێن پێشمەرگە دە: ھەتا ئیلۆنا 2026ێ ھەموو ھێز دێ ببن یەک
سوپاسالارێ وەزارەتا پێشمەرگە، فەریق روکن عیسا عوزێری راگھاند کو پرۆسەیا یەکخستنا ھێزێن پێشمەرگە د چارچۆڤەیا رەفۆرمێن وەزارەتێ دە ب لەز بەردەوام دکە. عوزێری دەستنیشان کر کو ئەڤ پرۆسە ھەتا مەھا ئیلۆنا ئیسال (2026ێ) دێ ب تەمامی ب داوی ببە و ھەموو ھێز د بن سیوانەکی نشتمانی دە وەرن کۆمکرن.
سوپاسالارێ وەزارەتا پێشمەرگە ئیرۆ، 19ێ گولانا 2026ێ، د کۆنفەرانسەکا رۆژنامەڤانی دە ئامار و زانیاریێن نوویێن دەربارێ برێخستنکرنا هێزێن پێشمەرگە دان. ل گۆری داخویانیا وی، وەزارەتا پێشمەرگە ھەتا نھا کاریە 8 فیرقەیێن لەشکەری ئاڤا بکە و د ھەمان دەمێ دە کارێن برێخستنکرنا فەرمانداریا ھەرێما یەکێ ژی ب سەرکەفتی ب داوی بوونە.
فەریق روکن عیسا عوزێری بال کشاند سەر پابەندبوونا حکوومەتا ھەرێما کوردستانێ ب پەیمانێن ناڤخوەیی و ناڤدەولەتی و وھا گۆت:
“ل گۆری ‘یاداشتنامەیا ھەڤتێگھشتنێ’، دڤێت ھەتا 25ێ ئیلۆنا 2026ێ ھێزەکە نەتەوەیی یا یەکگرتی د بن سیوانا وەزارەتا پێشمەرگە، حکوومەتا ھەرێما کوردستانێ و سەرۆکاتیا ھەرێما کوردستانێ دە وەرە ئاڤاکرن. ئەم پر گەشبینن کو ئەم دێ د وێ دیرۆکێ دە ڤێ پرۆسەیێ ب فەرمی و ب سەرکەفتی بداوی بکن.”
دەربارێ پێنگاڤێن کو مانە دە، سوپاسالارێ پێشمەرگە دیار کر کو ئەو نھا ل بەندا رادەستکرنا لیستەیا ناڤان یا فیرقەیا 10 و فەرمانداریا ھەرێما دویێ نە. ھات دەستنیشانکرن کو ب گھیشتنا ڤان لیستەیان، دێ ھەموو ھێزێن پێشمەرگە ب فەرمی د بن بانەکی لەشکەرییێ یەکگرتی و پرۆفیشنال دە جھ بگرن.
ئەڤ پێنگاڤێن بەربچاڤ د چارچۆڤەیا پرۆژەیا چاکسازیێ یا حکوومەتا ھەرێما کوردستانێ دە تێن ئاڤێتن. ئارمانجا بنگەھین یا ڤێ ستراتەژیێ ئەوە کو داوی ل دابەشبوونا سیاسی و ئیداری یا ھێزێن چەکدار وەرە ئانین و فەرمانداریەکە لەشکەری یا نووژەن، نشتمانی و پیشەیی ل ھەرێمێ وەرە سازوومانکرن.
