ئیرانێ دو گرتیێن سیاسی یێن کورد سێدارهدان
دەستھلاتا دادوەرییا ئیرانێ دو گرتیێن سیاسی یێن کورد ب تۆھمەتا ئەندامتیا پارتیێن رۆژھلاتێ کوردستانێ سێداره دان.
ئاژانسا نووچەیان یا فەرمی یا دەستھلاتا دادوەریێ یا ئیرانێ (میزان) ئیرۆ نووچەیا سێدارهدانا دو گرتیێن کورد یێن ب ناڤێن رامین زلە و کەریم مەعرووفپوور بەلاڤ کر.
ل گۆری میزانێ، ئەو گرتی ب تۆھمەتا ئەندامهتیا “کۆمێن جوداخواز” (مەبەست پارتیێن رۆژھلاتێ کوردستانێ نە) ھاتنە سێدارهدان.
میزانێ نووچە ب رەنگێ، “پشتی دەرباسکرنا قۆناغێن یاسایی یا ژ ئالیێ دیوانا بلند یا وهلاتی ڤە، جەزایێ سێدارهدانێ ل رامین زلە و کەریم مەعرووفپوور ھات برین” دا.
ل گۆری ئاژانسێ، جەزایێ وان ھەر دو کەسان ڤێ سبەھێ ھاتیە بجھانین لێ ل سەر جھێ سێدارهدانێ چ ئاگاھی نەھاتنە دایین.
رامین و کەریم کی نە؟
رامین زلە کوردە و ژ نەغەدەیێ یە. ژ ئالیێ لیوایا یەکەم یا دادگەھا شۆرەشێ یا مەھابادێ ڤە ب تۆھمەتا “ئەندامتیا پارتیا دەمۆکراتا کوردستانێ-ئیران (پهدهكه-ئیران)” جەزایێ سێدارهدانێ لێ ھاتبوو برین.
ل گۆری رێخستنێن مافێن مرۆڤان، 6ێ کانوونا پێشین یا 2025ێ جەزایێ رامین ب ئاوایەکی فەرمی ژێ رە ھاتبوو راگھاندن.
کەریم مەعرووفپوور ژی کوردە، 29 سالی یە و ئەو ژی ژ نەغەدەیێ یە.
ژ ئالیێ لیوایا یەکەم یا دادگەھا شۆرەشێیا مەھابادێ ڤە ب تۆھمەتا “ئەندامتیا پارتیا دەمۆکراتا کوردستانێ-ئیران” جەزایێ سێدارهدانێ ل وی ژی ھاتبوو برین.
کەریم 23یێ ئادارا 2021ێ ل سەردەشتێ ھاتبوو گرتن و 6ێ کانوونا پێشینا 2025ان جەزایێ وی ب ئاوایەکی فەرمی ژێ رە ھاتبوو راگھاندن.
ل ئیرانێ ژ دەستپێکا مەھا ئادارێ ڤە ھەری کێم 27 کەس ب بههانهیێن وەکی “تێکۆشینا چەکدارییا ل دژی کۆمارا ئیسلامییا ئیرانێ، تێکدانا ئەولەھیا نەتەوەیی و ھەڤکاریا ب ئیسرایل و ئامەریکایێ رە” ھاتنە سێدارهدان.
