ئاكه‌په‌ نەخشەرێیا نوو یا باخچەلی ده‌ربارێ ستاتویا ئۆجالان دنرخینە

نەخشەرێیا کو رۆژا دوشەمییا رابووری ژ ھێلا دەولەت باخچەلی، سەرۆکێ مه‌هه‌پێ و ھەڤالبەندێ سەرەکە یێ ئەردۆگان ڤە ھاتیه‌ راگھاندن، کو ئارمانجا وێ ڤەژاندنا پێڤاژۆیا “ترکیەیا بێ تەرۆر”ە، دێ د ئاستێن ھەری بلندێن پارتیا داد و گەشەپێدانێ ئاكه‌پێ دە وەرە نرخاندن.

ل گۆری راپۆرەکێ کو رۆژا سێشەمێ 19 ی گولانا 2026ێ ژ ھێلا رۆژنامەیا تورکیە ڤە ھاتییه‌ وەشاندن و پشتبه‌ستن ب ئاگاهیێن ئیستیخباراتا نەتەوەیی (میتێ) كرییه‌، دێ بەرنامەیەک نوو ژ بۆ پێڤاژۆیێ وەرە ئامادەکرن.

د راپۆرێ دە تێ گۆتن کو تێکلیێن گه‌رم د ناڤبەرا سازیێن ئەولەھیێ، ئیمرالیێ و قەندیلێ دە ده‌ست پێ کرنە دا کو لەزا پێڤاژۆیێ ڤەگەرینن.

وەکی بەشەک ژ تێکلیێن بەردەوامێن میتێ، تێ چاڤه‌رێكرن کو د دەمەک نێزیک دە نەخشەرێیەک و بەرنامەیەک نوو ل سەر کا پێڤاژۆ چاوا پێشڤە بچە دەرکەڤە ھۆلێ.

ڤه‌گوهه‌ستنا ئۆجالان بۆ نڤیسگەھه‌كه‌ تایبه‌ت

ل گۆری راپۆرا رۆژنامه‌یا توركیه‌، سەرۆکێ په‌كه‌كێ یێ گرتی عه‌بدوللا ئۆجالان دکارە ل گۆری ته‌علیماتێن رێڤەبەرییا سیاسی، ژ بۆ نڤیسگەھەکا تایبه‌ت یا لێکۆلینێ یا کو د ناڤ گرتیگەھا ئیمرالیێ دە ھاتییه‌ ئامادەکرن، وەرە ڤەگوهاستن.

هه‌روه‌ها هاتییه‌ گۆتن: نڤیسگەھ بەرێ ھاتبوو ئامادەکرن لێ ئۆجالان هێژان نەچوویە ور. لێ ئەگەر دەستوورا سیاسی وەرە دایین، سازیێن ئەولەھیێ دێ ڤەگوھاستنێ بجیھ بینن.

ھەر وھا ھاتیە دیارکرن کو د وێ دوه‌مێ ده‌ ئانكو پشتی ڤه‌گوهه‌ستنێ، دکارە دەستوور بێ دایین کو ئۆجالان هن جڤینێن ب پێڤاژۆیێ ڤە گرێدایی ل دار بخە.

ل گۆری راپۆران، رایەداران نرخاندنە کو تێکلیا راستەراست د ناڤبەرا ئۆجالان و رێخستنێ دە دکارە پێڤاژۆیا بێچەککرن و ھلوەشاندنا په‌كه‌كێ بلەزتر بکە.

ئاكه‌په‌ پێشنیازێن باخچەلی ب بالداری دبینە

باخچەلی رۆژا دوشەمییا رابووری میكانزمه‌كه‌ نوو ژ بۆ پێڤاژۆیێ پێشنیاز کر و خوه‌ست پێگه‌هه‌كی سینۆردار كری د بن ئاڤاھیەکێ کو وی ژێ رە دگۆت “ئۆفیسا کۆردیناسیۆنا پێڤاژۆیا ئاشتیێ و سیاسیکرنێ” دە بدن ئۆجالان.

باخچەلی گۆت، “دڤێ ئاڤاھیەک وەرە ئاڤاکرن کو تێ دە ئۆجالان بکاربە باندۆرا خوە ل سەر رێخستنێ بپارێزە ل شوونا کو وەکی سەرۆکێ دامەزرینەرێ په‌كه‌كه‌ یا ھلوەشیایی بمینه‌.”

ل گۆری رۆژنامەیا تورکیە، نرخاندنێن دەستپێکێ یێن ئاكه‌پێ ھن پێشنیازێن باخچەلی – د ناڤ دە دایینا “ستاتویا جڤاکی” و رۆلا کۆردیناتۆری ژ بۆ ئۆجالان – وه‌كه‌ ده‌ستپێك به‌رئاقل لێ گرێدایی شەرت و مەرجێن تایبەت دیتنە.

د راپۆرێ دە ھاتیە گۆتن کو سەرۆکاتیا ئاكه‌پێ هێژان ژی دودلە کو گاڤێن نوو باڤێژە بەری کو بێچەککرنا په‌كه‌كێ ب تەڤاھی وەرە پشتراست کرن. ئاكه‌په‌ ب بەردەوامی تەکەز کریە کو دانینا چەکان شەرتێ پێشین یێ ھەر گاڤێن سیاسی یان قانوونی یێن پێشەرۆژێ یە.

راپۆرا ئیستیخباراتا ترکیێ دێ قۆناغا بهێت دیار بكه‌

ل گۆری راپۆرێ، ئەنجامێن تێکلیێن میتێ ب ئۆجالان و رێڤەبەریا قەندیلێ رە دێ قۆناغا پێش مه‌ یا پێڤاژۆیێ دیار بکە.

ل گۆری ئەنجامێن میتێ، تێ چاڤه‌رێكرن کو ئاک پارتی و سازیێن ئەولەھیێ بەرنامەیەک بەرفرەھ ئامادە بکن.

گەر رێخستن ل گۆری نەخشەرێیێ گاڤێن دن باڤێژە، دبە کو نیقاش ل سەر رێزکنامەیێن قانوونی، د ناڤ دە ستاتویا ئۆجالان، دەست پێ بکن.