مەسروور بارزانی: ئەم ھەول ددن کو د زووترین دەم دە کابینەیا نوویا حکوومەتێ پێک بێ

سەرۆکوەزیرێ ھەرێما کوردستانێ مەسروور بارزانی، د چارچۆڤەیا سەردانا خوەیا فەرمی یا ژ بۆ بەغدایێ دە، داخویانیێن گرنگ دان مەدیایێ. بارزانی راگھاند کو وان ب فەرمی داخواز کریە کو مووچەیێ فەرمانبەرێن ھەرێما کوردستانێ ژ ھەموو پرسگرێکێن سیاسی و تەکنیکی یێن د ناڤبەرا ھەولێر و بەغدایێ دە وەرە ڤەقەتاندن دا کو مینا فەرمانبەرێن دن یێن ئیراقێ سەرەدەری لگەل وەرە کرن.

سەرۆکوەزیر مەسروور بارزانی ئیرۆ، 23 گولانێ، د کۆنفەرانسەکە رۆژنامەڤانیێ دە بال کشاند سەر تێکلیێن خوەیێن ل گەل ئالیێن سیاسی یێن ئیراقێ و گۆت: “تێکلیەکە مە یا دیرۆکی و دەمدرێژ لگەل ھەڤپەیمانیا عەزم ھەیە و خالێن مەیێن ھەڤپار گەلەکن. ئەم دێ ژ بۆ چارەسەرکرنا وان مژارێن کو ھەتا نھا د ئاستا فەدەرال دە مانە، ھەڤاھەنگیا خوەیا ب ھەڤ رە بەردەوام بکن.”

د بەردەوامیا ئاخافتنا خوە دە، بارزانی ل سەر پارڤەکرنا مافێن دارایی یێن ھەرێمێ راوەستیا و تەکەز کر کو نابە دەبارا ژیانا خەلکێ ببە ئاموورا ناکۆکیان. سەرۆکوەزیر دیار کر کو د جڤینان دە داخوازا وان یا سەرەکە ئەوە کو مژارا مووچەیان ژ پرسگرێکێن دن وەرە جوداکرن و دڤێت مووچەیێ فەرمانبەرێن ھەرێما کوردستانێ وەک مووچەیێ ھەموو وەلاتیێن دن یێن ئیراقێ ب ئاوایەکی ئاسایی و بێ گیرووبوون وەرە دایین.

دەربارێ ئاڤاکرنا کابینەیا نوو یا حکوومەتا ھەرێما کوردستانێ دە ژی، مەسروور بارزانی ھەلوەستا خوە ب زەلالی نیشان دا و راگھاند: “مە ژ مێژ ڤە داخواز کریە کو کابینەیا نوویا حکوومەتێ وەرە ئاڤاکرن. ژ ئالیێ مە ڤە ت ئاستەنگی و پرسگرێک نینە و ئەم ھەموو ھەولێن خوە ددن دا کو کابینەیا حکوومەتێ د زووترین دەم دە پێک بێ.”