نەبوونا زمانێ کوردی ل سەر تابلۆیا کۆشکا دادێ یا حەسەکێ بوو سەدەما گرژیێ
شەڤا بۆری ل باژارێ حەسەکێ، پشتی کو تابلۆیا نوویا ئاڤاھیا کۆشکا دادێ تەنێ ب زمانێ عەرەبی ھات دانان، جارەکە دن پێلەکە نەرازیبوونێ دەرکەت و د ئەنجامێ دە د ناڤبەرا وەلاتیان و ھێزێن ئەولەھیێ دە گرژی چێبوو. نەبوونا زمانێ کوردی ل سەر تابلۆیا سازیەکە فەرمی یا پارێزگەھێ، وەکی سەدەما سەرەکەیا ڤێ راگەشیێ ھات دەستنیشانکرن.
ل گۆری زانیاریێن ژ جھێ بوویەرێ ھاتنە گرتن، د دەما بلندکرنا تابلۆیێ دە ھەژمارەکە زێدە یا ھێزێن ئەولەھیێ ل دەردۆرا ئاڤاھیا کۆشکا دادێ ھاتن بەلاڤکرن. د ھەمان دەمێ دە، فکار و نەرازیبوونا وەلاتی و خوەپێشاندەرێن کو ل ور کۆم بووبوون ڤەگوھەری ئالۆزیێ و د ناڤبەرا ھەر دو ئالیان دە گرژی توندتر بوو.
خوەپێشاندەرێن کو ل دژی ڤێ بریارێ دەرکەتین راگھاندن کو پشتگووھکرنا زمانێ کوردی ل ھەرێمێ نایێ قەبوولکرن. وان داخواز کر کو دڤێت زمانێ کوردی وەکی زمانەکی فەرمی ل کێلەکا زمانێ عەرەبی ل سەر تابلۆیێ وەرە نڤیساندن و مافێن چاندی و زمانی یێن شێنیێن ھەرێمێ وەرن پاراستن.
ھێژایی گۆتنێیە کو ئەڤ پرسگرێک نە جارا یەکەمە کو روو ددە؛ ژ دەستپێکا مەھا گولانێ ڤە ئەڤ چەند جارن کو تابلۆیا کۆشکا دادێ یا حەسەکێ تێ گوھەرتن، تێ داخستن یان ژی ژ ئالیێ وەلاتیێن ھێرسبوویی ڤە تێ شکاندن. چاڤدێرێن ھەرێمی دیار دکن کو ھەتا داخوازێن خوەپێشاندەران نەیێن بەرسڤاندن و زمانێ کوردی ل سەر سازیێن فەرمی جھ نەگرە، مەترسیا بەردەوامبوونا ڤان ئالۆزیان ھەیە.
