عادل عهبدولمههدی: گەلێ کوردستانێ خوەدی مافێ دیارکرنا چارەنڤیسا خوەیە
سەرۆکوەزیرێ بەرێ یێ ئیراقێ عادل عهبدولمههدی، پشتی جڤینا لگەل سەرۆکوەزیرێ ھەرێما کوردستانێ مەسروور بارزانی، پشتگریا خوە ژ بۆ مافێن نەتەوەیی یێن کوردان ئانی زمان. عهبدولمههدی ھەروھا بانگ ل ئیراقێ کر کو پۆلیتیکایا خوە ل گۆری پەیمانا نوو یا ناڤبەرا تەھران و واشنگتۆنێ سەرەراست بکە.
عادل عهبدولمههدی ئیرۆ یەکشەمێ (24.05.2026)، د داخویانیەکێ دە ژ بۆ رۆژنامەڤانان، ناڤەرۆکا ھەڤدیتنا خوەیا ل گەل مەسروور بارزانی و نێرینا خوە یا ل سەر گەشەدانێن ناڤچەیێ پارڤە کر.
عهبدولمههدی پشتگری دا مافێ کوردان یێ دیارکرنا چارەنڤیسێ و گۆت:
“دڤێ گەل بخوە ل سەر چارەنڤیسا خوە بریارێ بدن. گەلێ ھەرێما کوردستانێ، مینا ھەموو گەلێن دن یێن جیھانێ، ھەڤبەشەکی رەسەنێ ڤێ ناڤچەیێ یە و کۆکا وان د ڤێ خاکێ دەیە. لەوما مافێ وان یێ تام ھەیە کو ل سەر پاشەرۆژا خوە بریارێ بدن.”
سەرۆکوەزیرێ بەرێ یێ ئیراقێ بال کشاند سەر پەیمانا نوویا ناڤبەرا ئامەریکا و ئیرانێ و دەستنیشان کر کو دڤێ ئیراق د ناڤ ڤێ چارچۆڤەیێ دە تەڤبگەرە و گۆت: “پێدڤییە ئیراق گاڤێن خوە ل گۆری پەیمانا نوو یا ناڤبەرا تەھران و واشنگتۆنێ باڤێژە و خوە ل گۆری ڤان گوھەرتنان بگونجینە.”
دەربارێ رەوشا ئەولەھی و ھەبوونا ھێزێن بیانی دە، عادل عهبدولمههدی ھەلوەستەکە رەخنەگر نیشان دا و وھا ئاخڤی: “ھەبوونا ھێزێن بیانی ل سەر خاکا ئیراقێ نە راستە. ھەروھا، ئێریشکرنا ل سەر گەلێن ناڤچەیێ کارەکی نادروستە.”
عهبدولمههدی د بەردەوامیا ئاخافتنا خوە دە ئێریشێن ل سەر غهززه و ئیرانێ شەرمەزار کرن، لێ د ھەمان دەمێ دە ئێریشێن ئیرانێ یێن ل ناڤچەیێ ژی وەکی “نادروست” پێناسە کرن و داخوازا چارەسەرکرنا ئالۆزی و راگەشیان ب رێیا دیالۆگێ کر.
