مەسروور بارزانی: شۆرەشا گولانێ سەلماند کو ئیرادەیا گەلێ کوردستانێ ژ ھەموو پیلانان بھێزترە
جیگرێ سەرۆکێ پارتیا دەمۆکراتا کوردستانێ مەسروور بارزانی ب بۆنەیا 50 سالیا دەستپێکرنا شۆرەشا گولانێ پەیامەک بەلاڤ کر و تێ دە راگھاند: “شۆرەشا گولانێ نە تەنێ پیلانێن دژمن و نەحەزێن کوردستانێ تێک برن، لێ بەلێ ئاسۆیەکە نوو ل پێشیا تەڤگەرا رزگارخوازییا گەلێ کوردستانێ ڤەکر.”
دەقا پەیاما جیگرێ سەرۆکێ پدکێ مەسروور بارزانی:
د سالڤەگەرا پێنجی سالیا دەستپێکرنا شۆرەشا 26ێ گولانێ دە، ب روومەت و شانازیەکە مەزن ڤە، ئەم ھەموو شەھیدێن سەربلند، پێشمەرگەیێن قەھرەمان، تێکۆشەر و خەباتکارێن ڤێ شۆرەشێ ببیر تینن؛ تەڤی رەوشا دژوارا وێ دەمێ، وان ب مۆرالەکە بلند دەست ب خەبات، تێکۆشین و بەرەڤانیا ل مافێن رەوایێن گەلێ کوردستانێ کرن.
شۆرەشا گولانێ، نە تەنێ پیلانێن دژمن و نەحەزێن کوردستانێ تێک برن، لێ بەلێ ئاسۆیەکە نوو ل پێشیا تەڤگەرا رزگارخوازییا گەلێ کوردستانێ ڤەکر و سەلماند کو داخواز و ئیرادەیا گەلێ کوردستانێ ژ ھەر پیلانەکێ بھێزترە. د ئەنجامێ دە، ب سایا خوەراگری، یەکرێزی و ھەڤدەنگیا گەلێ مە، راپەرین، ئازادیا وەلات و گەلەک دەستکەفتێن دن یێن نشتمانی ھاتن بدەستخستن.
د سالڤەگەرا پێنجی سالی و یۆبیلەیا زێرینا شۆرەشا گولانێ دە، سلاڤ ل گیانێ پاکێ بارزانیێ نەمر، کاک ئیدریسێ ھەردەم ساخ و ھەموو شەھیدێن شۆرەشا گولانێ و ھەموو شەھیدێن کوردستانێ.
