سەرۆک بارزانی: شۆرەشا گولانێ قۆناغەکا گرنگ و چارەنڤیسساز یا خەباتا گەلێ کوردستانێ بوو
سەرۆک مەسعوود بارزانی، ب مناسەبەتا سالڤەگەرا 50یێ یا دەستپێکرنا شۆرەشا گولانێ، پەیامەک بەلاڤ کر.
پەیاما سەرۆک بارزانی وەھایە:
ب ناڤێ خوەدایێ مەزن و دلۆڤان
شۆرەشا گولانێ قۆناغەکا گرنگ و چارەنڤیسسازا خەباتا گەلێ کوردستانێ بوو. ئەڤ شۆرەش بەردەوامی و ھلگرا پەیام و ئارمانجێن شۆرەشا مەزنا ئیلۆنێ بوو. شۆرەشا گولانێ ژ بۆ ھەموو ئالیان ئیسبات کر کو ھەگەر د قۆناغەکێ دە خەباتا گەلێ کوردستانێ بۆ دەمەکێ کورت راوەستیابە ژی، لێ ئیرادەیا گەلێ کوردستانێ چ جاران نەشکەستیە؛ لێ بەلێ ژ بۆ گھیشتنا ب ئارمانجێن پیرۆز، ب ھێڤی و ھێزەکە نوو د تێکۆشین و خەباتا خوە دە بەردەوام بوویە. شۆرەشا گولانێ سەرکەتن ب دەست خست، ژ بەر کو پشتا خوە دا قەھرەمانیا پێشمەرگە و خوەراگریا گەل و رێخستنەکە ب ھێز و درووشم و ئارمانجێن زەلال.
د سالڤەگەرا 50یێ یا دەستپێکرنا شۆرەشا گولانێ دە، ئەز روومەت و سپاسییێن خوە پێشکێشی گەلێ کوردستانێ و ھەموو وان تێکۆشەر، پێشمەرگە و نیشتمانپەروەران دکم، یێن کو ل ھوندر و دەرڤەیی کوردستانێ رۆلەکێ قەھرەمانانە د شۆرەشا گولانێ دە لیستن و دیرۆکەکا گەش و تژی شانازی ژ بۆ گەلێ خوە تۆمار کرین.
د ڤێ بیرئانینێ دە، ئەم سلاڤان ژ بۆ جانێ یەکەم شەھیدێ شۆرەشا گولانێ شەھید سەیید عەبدوللا حاجی عۆمەرانی و شەھیدێن شۆرەشا گولانێ و ھەموو شەھیدێن کورد و کوردستانێ دشینن. ئازادی و دەستکەفتێن دن یێن گەلێ مە، بەرھەما خوینا شەھیدان و قەھرەمانیا پێشمەرگە و رەنج و دلسۆزیا خەباتکارێن شۆرەشا گولانێ و ھەموو شۆرەشێن گەلێ کوردستانێ نە.
مەسعوود بارزانی 26ێ گولانا 2026ێ
