رەوشا بافل تالابانی وەک وێ مهتهلۆكا چینی یە یا كو دبێژیت: «کاکۆنۆ ھاکر سۆکۆمۆیو تۆکاژ» !!
مەتەلۆکەکا چینی ھەیە دبێژیت: «کاکۆنۆ ھاکر سۆکۆمۆیو تۆکاژ»؛ ئانكو؛ «ھوون چ قاسی بزڤرن ژی، “قوون” دیسا ژی ل پشت وە یە».
بافل تالابانی د جڤینەکێ دا کو ژ بۆ سالڤەگەرا 51ێ یا یهنهكێ ھاتە لدارخستن ئاخڤی. ب راستی، دەما کو من گوھ دا ئاخفتنا وی، مەتەلۆکا چینی یا ل سهری ھات بیرا من. بافل تالابانی دزڤریت، تەقلا دئاڤێژیت، ژ جھەکی بەر ب جھەکێ دی ڤە دبەزیت، لێ دیسا ژی نهشێت جھێ قوونا خوە بگوهۆریت.
ھەر رێزەک د ئاخفتنا بافل تالابانی دا فاول بوو. ھەر ھەڤۆکەکا وی ب تەڤاھی بەرەڤاژی وی تشتی بوو یێ کو ئەو دکەت.
وی بێی کو شەرم ژی بکەت بەحسا یەکیتیا کوردان کر. وی گۆت: “دڤێت ئەم ب ھەمی پارتییێن ل کوردستانێ ب روحەکا یەکیتییێ بهرهیهكێ نەتەوەیی ئاڤا بکهین. وەکی پارتییێن ژ ھەر چار پارچەیێن کوردستانێ، دڤێت ئەم بهێین جەم ھەڤ و ب سیاسهتێن خوە ل ھەڤ بکهین. تەنێ وێ دەمی ئەم دشێین بگههینه وێ کوردستانا کو ئەم خەیال دکهین.”
گاڤا مرۆڤ گوھدارییا وی دکەت ئەڤ پرسه تێ بیرا مه: گەلۆ ئەڤ زلامه چ دخۆت و چ ڤەدخۆت؟
بافل ھەموو ئۆپۆزسیۆنا د ناڤ یهنهكێ دا ژ ھۆلێ راکر، کەسایەتیێن وهك ھاوکار جاف و موراد کانیکوردە کوشتن، نە تەنێ کەسایەتیێن سەرەکی یێن یهنهكێ یێن وهك مەلا بەختیار ژ پارتیێ دەرخستن، لێ د ھەمان دەمی دا دەست دانا سەر ملکێ وان، پسمامێ خوە لاهۆر جەنگی ب تانک و تۆپان تهسفیە کر، ھەر کەسێ کو جەسارەت کر کو ل سلێمانیێ وی رەخنە بکەت ب ھێزێن تایبەت یێن یهنهكێ ترساند، بێلۆمە بیت، لێ دیسا ژی قالا دەمۆکراسی و یەکیتییێ دکەت.
د ناڤ یهنهكێ دا یەکیتی نینه، لێ دیسا ژی بەحسا یەکیتییا کوردان دکەت…
ل سلێمانیێ، ژ بلی پەسندارێن بافل چ رۆژنامەڤان، سازی و رەوشەنبیر نهشێن ل وێرێ ب هێمنی بژین. لێ دیسا ژی، ئەو بەحسا یەکیتیا کوردان دکهن.
سلێمانیێ، کو ژ ھێلا بافل تالابانی ڤە دهێته برێڤەبرن، پێشمەرگەیێن رۆژھلاتێ کوردستانێ رۆژانە ژ ئالیێ ھێزێن ئەولەھیێ یێن یهنهكێ ڤە دهێنه ترساندن، ھەتا پێشمەرگەیا ژن غهزال مەولان یا بریندار ژی ژ بەر ترسا ئیرانێ نە ھەلگرتن نەخوەشخانەیان و ژ بەر ھەلوەستێ یهنهكێ وێ ژیانا خوە ژ دەست دا.
بافل و یهنهكه وەک پێکھاتەیهكا ئیرانی تەڤدگەرن، ھەول ددەن کو تەڤگەرێن رۆژھلاتێ کوردستانێ ژ ناڤ ببهن، لێ دیسا ژی بەحسا یەکیتیا کوردان دکەت.
ئەو وەکی ئاکتۆرێ سەرەکی د سیاسەتا ئیران و ئراقێ یا ژ بۆ ھلوەشاندنا ستاتۆیا کوردستانێ تەڤدگەرن. دو سالن، د سهر ھەموو ھەولدانان، رێ ل بەر ئاڤاکرنا حکوومەتا ھەرێما کوردستانێ ل گۆری ئهجێندایا بهرهیێ دژه-کورد، گرتیە.
لێ دیسا ژی بەحسا یەکیتیا کوردان دکەت.
ھەتا ب ھەڤکارییا حهشدا شهعبی وهستگهها گازا کۆر-مۆر بۆمبەباران دکەت دا کو بشێت حكوومهتا ھەرێما کوردستانێ لاواز بکەت.
ئەوی ب رێیا کرێگرتیێن خوە گەفێن شهوتاندنا رافنەریا لاجانێ دكر، ژ بۆ کو سەرکەفتنا پهدهكێ یا د ھلبژارتنێن پهرلهمانێ ئیراقێ ب دەست خستی تێک ببهت. ئەو داھاتیێ پەترۆل و گازێ یێ گەلێ کورد ئاسێ دکەت، و ب قەشمەری بەحسا “رەوشا ئابۆرییا گەلێ کورد” دکەت.
بافل تالابانی دبێژیت: “دڤێت ئەم ل گهل ھەموو پارتییێن ل کوردستانێ ب روحەکا ھەڤگرتی بهرهیهكێ نەتەوەیی ئاڤا بکهین،” لێ پاشێ ب دزیڤە کەرکووکێ ددەته ترکمەنان دا کو سەرۆککۆمارییێ بوو یهنهكێ مسۆگەر بکەت.
بافل تالابانی دبێژیت: “ئیرۆ، ھەموو پارتی گوھ ددهنه یهنهكێ. ئەمەریکا، ئەورۆپا، رووسیا، چین، و ھەروەھا جیرانێن مە ئیران و وەلاتێن عهرهبی، ھەمی گوھ ددونه دەنگێ یهنهكێ. یهنهكه د چارەسەرکرنا پرسگرێکێن دهڤهرێ دا رۆلەکێ سەرەکی دگێریت،” لێ بوو وی کورسییەکا گوھدارڤانیێ ژی د پهرلهمانێ ئیراقێ دا نەھاتە دەستنیشان کرن و وەک قوتابیێن سەرەتایی ل سەر کورسییان خوە دهاڤێژیت دا کو بگههیته کورسییەکێ.
ب كورتی، چ تشتهكێ کو بافل تالابانی دبێژیت بنگەھەکێ راستین ژ بۆ نینە.
تەنێ راستیا د ئاخفتنا وی یا 31ێ گولانێ دا ئەڤەیه کو وی ل گهل تەڤگەرا نهوهی نوێ یا شاسوار عهبدولواحد ھەڤپەیمانییەک چێکرییە. ئەو ھەڤپەیمانی نە ھەڤپەیمانیەکا کوردی یە، ھەڤپەیمانیەکا چەقەلانە. ھەڤپەیمانییا چەقەلان چ مفای ناگههینیته کوردان.
راستیا بافل تالابانی ئەوە کو ئەو یەک ژ وان کەسانە بووینه ئهگهرێ بهرزهكرنا کوردان بۆ 100 سالان، یێن کو ھەتا ژ بۆ کوردان خیرەت نهكهن کو بەندێن پێلاڤێن خوە گرێدن، ژ بۆ بەرژەوەندییا خوە و یا دژمنێن خوە ھەر تشتی دکهن. ئهڤ راستییا بافل نە مەدیایا پهكهكێ و نڤیسکارێن وێ یێن کو پەسنا وی ددهن دگوهۆریت، نە ژی ب بەرنامەیێن یۆتوبەرێن ئهمهریكی یێن کو ژ بۆ پارهی چێدكهن، دهێته گوهۆرین.
ژ بەر ڤێ یەکێ، ئەو چ بکەت بلا بکەت، “ئەو چ قاس وەکە ڤرڤرۆکێ بزڤریت ژی، قوونا وی ل پشت وی یە.” دبیت کو ئەڤ مهتهلۆك ب كهنی خویا بكهت ژی، لێ بافل تالابانی وەک گەفەک-دژمنەک ل سەر ستاتۆیا ھەرێما کوردستانێ رادوەستیت.
