ئەبوو عۆمەر ئیدلبی: سینۆردارکرنا گەلێ کورد د ناڤ پارتیەکێ دە نەخوەندەواریا دیرۆکییە

فەرماندارێ ھێزێن دەمۆکراتیک یێن باکور ئەبوو عۆمەر ئیدلبی، رووپەلا دیرۆکی یا بھەڤرەژیانا کورد و عەرەبان ڤەکر و بەرسڤەکە توند دا وان دەردۆرێن کو ناسنامەیا میلەتەکی تەمام د ناڤ چارچۆڤەیەکە تەنگا سیاسی دە ئاسێ دکن. ئیدلبی راگھاند کو کورد نە تەنێ پارتیەک یان ئیدەۆلۆژیەکن، بەلکی گەلەکی رەسەن، پڕەنگ و خوەدی دیرۆکن.

فەرماندارێ ڤێ ھێزێ (کو د بن سیوانا ھێزێن سووریەیا دەمۆکراتیک – ھەسەدێ دە تەڤدگەرە) ئیرۆ ل سەر حەسابا خوەیا فەرمی یا تۆرا جڤاکی “ْX”ێ داخویانیەک بەلاڤ کر. ئیدلبی رەخنەیێن توند ل وان نێزیکاتیێن مەژیتەنگ گرتن کو راستیا جڤاکان د درووشم، پۆست یان ڤیدەۆیەکێ دە کورت دکن و گۆت: “یێن کو تەنێ پرۆژەیەکە سیاسییا یەکگرتی د ناڤ کوردان دە دبینن، نە ژ دیرۆکێ فێم دکن و نە ژی ژ جەوھەرێ گەلان تشتەکی نزانن.”

ئیدلبی بال کشاند سەر پڕەنگیا جڤاکا کوردی و مۆزایکا وان یا جڤاکی وھا رێز کر:

پڕەنگیا ئۆلی و باوەریێ: د ناڤ کوردان دە مسلمانێن سونی، عەلەوی، ئێزدی، شیعە، کرستیان و جھوو ھەنە.

بنیادا فکری و سیاسی: ژ سۆفی و کەڤنەپارێزان بگرە ھەتا سکولار، نەتەوەپەروەر، ئیسلامی و چەپگران؛ ب دەھان تەڤگەرێن وان یێن جودا ھەنە کو تام وەکی رەوشا جڤاکا عەرەبانە.

برینا کوورا ھەرێمێ: پەیمانا سایکس بیکۆ

فەرماندارێ ھەسەدێ د پەیاما خوە دە بال کشاند سەر سەردەما بەریا پەیمانا سایکس بیکۆ و دەستنیشان کر کو بەرێ چ سینۆر د ناڤبەرا گەلان دە نەبوون. ئیدلبی دیار کر کو ڤێ پەیمانێ بەریا ھەر کەسی عەرەب دابەش کرن و پشترە سینۆر دانین دا کو برایان، باژاران و بازاران ژ ھەڤ قوت بکن؛ تەڤی کو ل سووریەیێ ب دەھان گوندێن عەرەب و کوردان ب دەھان سالانە نان، ئاڤ، شاھی و خەمێن خوە پارڤە کرنە.

ئەبوو عۆمەر ئیدلبی د داویا نرخاندنا خوە دە تەکەز کر کو ناسکرنا دیرۆک و روومەتا گەلان راستەخوە ب یەکبوونا وان ڤە گرێدایییە و ژ روومەتا کەسی کێم ناکە. وی داخویانیا خوە ب پرسەکە گرینگ کو روویێ پۆلیتیکایا ھەرێمی نیشان ددە ب داوی کر: “تو ل دژی سایکس-بیکۆی یان پێ رەیی؟”