9 سال د سەر بریارا رەفەراندووما سەرخوەبوونا کوردستانێ رە دەرباز بوون
ئیرۆ 9 سال د سەر یەک ژ وێرەکترین و ستراتەژیکترین بریارێن دیرۆکا ھەڤچەرخ یا گەلێ کورد رە دەرباز بوون، کو ئەو ژی بریارا لدارخستنا رەفەراندووما سەرخوەبوونا کوردستانێ یە کو نەخشەیا سیاسییا دەڤەرێ ھەژاند.
ل رۆژا 7ێ خزیرانا 2017ێ، د جڤینەکە بەرفرەھ دە ب سەرپەرشتییا سەرۆک مەسعوود بارزانی و ب پشکدارییا پرانیا ھەری زێدە یا ئالیێن سیاسی یێن ھەرێما کوردستانێ، بریارەکە دیرۆکی ھات دان. بریار ئەو بوو کو د 25ێ ئیلۆنا 2017ێ دە گەلێ کوردستانێ ب رێیا سندۆقێن دەنگدانێ چارەنڤیسا خوە دیار بکە.
د وێ رۆژێ دە، ئالیێن سیاسی یێن وەکی پارتیا دەمۆکراتا کوردستانێ (پهدهكێ)، یەکیتیا نشتمانییا کوردستانێ (یهنهكێ)، پارتیێن ئیسلامی و نەتەوەیی و پێکھاتەیێن جودا د بن سیوانا “ئەنجوومەنا بلندا رەفەراندوومێ” دە جڤیان. پەیاما سەرەکە ئەو بوو کو پشتی 9 دەھسالان ژ دەردەسەری و بنپێکرنێن دەستوورێ ژ ئالیێ بەغدایێ ڤە، ئێدی دەما وێ ھاتیە کو گەل گۆتنا خوە یا داویێ بکە.
تەڤی زەختێن بێھەمپا یێن ناڤدەولەتی و گەفێن وەلاتێن جیران ژ بۆ گرتنا سینۆران و لدارخستنا مانۆرێن سەربازی، سەرۆک بارزانی وەکی پارێزەرێ ڤێ دۆزا نەتەوەیی د تەڤاھیا ھەڤدیتنێن دیپلۆماتیک و جەماوەری دە تەکەز دکر کو رەفەراندووم مافەکێ خوەزایی و قانوونی یێ گەلێ کوردستانێ یە و چ ئالتەرناتیڤەک نینە کو گارانتیا مافان بکە. ئەو ل سەر وێ یەکێ رژد بوو کو دڤێ گەل ب خوە بریارێ بدە، نە کو زەختێن دەرڤە.
ئەڤ رژد بوون بوو سەدەم کو د 25ێ ئیلۆنا 2017ێ دە، کارناڤالەکا نەتەوەیی یا بێھەمپا ل ھەرێما کوردستانێ و دەڤەرێن کوردستانی یێن ل دەرڤەیی ئیدارەیا ھەرێما کوردستانێ برێڤە بچە. ئەنجاما وێ ژی دیرۆکی بوو؛ زێدەتر ژ 92%یا خەلکێ کوردستانێ ب بەلێ دەنگێ خوە بۆ سەرخوەبوونێ دا. ل گۆری گۆتنا چاڤدێرێن ناڤدەولەتی ژی، د جیھانێ دە ئەو یەک ژ پاقژترین و دەمۆکراتیکترین پێڤاژۆیێن دەنگدانێ بوو.
ئیرۆ پشتی 9 سالان، بریارا 7ێ خزیرانێ وەکی وەرچەرخانەکا دیرۆکی تێ دیتن، کو تێ دە کوردان نیشان دا؛ تەڤی دۆرپێچ و جەزایێن ب کۆم، خوەستەکا نەتەوەیی ژ بۆ گھیشتنا ب مافێن رەوا ناتەوە و رەفەراندووم وەکی ناسنامەیەکا قانوونی و سیاسییا ھەردەمی د ئارشیڤا گەلێ کورد دە دێ زندی بمینە.
