ل قۆسەرێ کۆنفەرانسا یەکیتیا نەتەوەیی ھات لدارخستن
ھەژمارەک پارتیێن سیاسی، تەڤگەر و کەسایەتێن سەربخوە یێن باکورێ کوردستانێ ل ناڤچەیا قۆسەرێ یا مێردینێ کۆنفەرانسەک لدار خستن. د کۆنفەرانسێ دە داخوازا ئاڤاکرنا تەمسیلیەتەکە نەتەوەیی و خورتکرنا ھەڤکاریا ناڤخوەیی ھات کرن.
“کۆمیسیۆنا ھەولدانا کۆنفەرانسا یەکیتیا نەتەوەیی یا باکورێ کوردستانێ”، کو ژ پێلکورد، پارتیا سۆسیالیستا کوردستانێ (PSK)، پارتیا وەلاتپارێزێن کوردستانێ (PWK)، تەڤگەرا ڤەژینێ یا کوردستانێ (ڤەژین) و کەسایەتێن سەربخوە پێک تێ، ئیرۆ 7ێ خزیرانا 2026ان ل ناڤچەیا قۆسەرێ یا مێردینێ کۆنفەرانسەک پێک ئانی.
کۆنفەرانس ب خولەکە رێزگرتنێ ژ بۆ شەھیدێن کوردستانێ و خوەندنا سروودا نەتەوەیی “ئەی رەقیب” دەست پێ کر. د بەشا یەکەما کۆنفەرانسێ دە سەرۆک و نوونەرێن پارتیان ئاخڤین. جێگرێ سەرۆکێ گشتی یێ پهسهكێ سهرحهد ئامەدی، رێڤەبرێ پێلکوردێ فوئاد ئۆنەن، بەردەڤکێ ڤەژینێ فەرید ئازاد، ل سەر ناڤێ کەسایەتێن سەربخوە عهلی ئۆنجوو و سەرۆکێ گشتییێ پارتیا وهلاتپارێزێن كوردستانێ موستافا ئۆزچەلیک بال کشاندن سەر پێدڤیا کوردان یا ب یەکیتی و تفاقێن ستراتەژیک.
کۆنفەرانس ب بەشداریا نوونەرێن گەلەک پارتی، سازیێن سڤیل و کەسایەتێن ناڤدار برێڤە چوو. نوونەرێن پهدهكه-باکور، ھاک-پار، پارتیا دەمۆکراتا کوردستانێ-سووریە (پهدهكه-س)، تەڤگەرا ئازادیا کوردستانێ ل سووریێ، ئەل پارتی، وەقفا حەمیدێ سمایلاغا، نووبھار و کۆمەلەیا جۆتکاران د کۆنفەرانسێ دە ئامادە بوون. ھەروھا بارۆیا مێردینێ، ئۆدەیا بازرگانیا نسێبینێ و گەلەک رەوشەنبیر و سییاسەتمەداران ژی پشتگری دان کۆنفەرانسێ.
ل گۆری داخویانیێ، کۆنفەرانسا قۆسەرێ د ناڤا رایا گشتییا باکورێ کوردستانێ دە باوەری و ھێڤیا ئاڤاکرنا تەمسیلیەتەکە نەتەوەیی گەش کر. ئامادەکارێن کۆنفەرانسێ راگھاندن کو ئەڤ خەبات ب قۆسەرێ ب سینۆر نامینە و د رۆژێن پێش دە دێ ل باژارێن دن یێن باکورێ کوردستانێ و ترکیەیێ ژی کۆنفەرانسێن ب ڤی رەنگی وەرن ل دار خستن.
