ئەردۆگان ستراتەژیا سەدسالا نوو ئەشکەرە کر
سەرۆککۆمارێ ترکیەیێ رەجەب تەییب ئەردۆگان، د داخویانیێن خوەیێن داوی دە کو ئیرۆ سێشەمێ (9ێ خزیرانا 2026ێ) ھاتن بەلاڤکرن، بیردۆزا دەولەتێ یا ل دۆر روودانێن داوی نرخاند. ئەردۆگان دیار کر کو پێنگاڤێن د بن ناڤێ “پێڤاژۆیا ئاشتیێ” دە تێن ئاڤێتن، پارچەیەک ژ نەخشەرێیەکە کوور و ستراتەژیکا سەدسالا نوویا ترکیەیێ نە و نابە کو ئەڤ ھەولدان تەنێ وەکی پۆلیتیکایەکە ئاسایی یا ئەولەھیێ وەرن دیتن.
ئەردۆگان بال کشاند سەر سەرخوەبوونا سیاسی یا ئەنقەرەیێ و دەستنیشان کر کو شیانا وەلاتێ وی یا د بریاردانا سەربخوە دە، بنگەھا سەرەکەیا ھەڤکێشەیێن نوویێن ناڤدەولەتییە؛ ژ ھەرێما کەنداڤێ بگرە ھەتا باکورێ ئافریقایێ و رۆژھلاتێ دەریایا ناڤین. ئەردۆگان راگھاند کو ئەڤ هێزا پلانکرنێ و وێرەکیا سیاسی، د ھەمان دەمێ دە مۆتۆرا سەرەکی یە د پێڤاژۆیا ژناڤبرنا فاکتەرێن تەرۆرێ دە.
ئەردۆگان د بەردەوامیا نرخاندنا خوە دە ئاسۆیا پاشەرۆژێ یا ڤێ ستراتەژیێ ئەشکەرە کر و گۆت: “گاڤا کو ئەڤ پێڤاژۆ ل گۆری ئارمانجێن سیستەماتیک یێن دەولەتێ ب سەرکەفتی ب ئەنجام ببە، دێ د سەری دە ئەنیا ناڤخوەیی یا وەلات خورت بکە، سیستەما ئەولەھیێ یا ترکیەیێ گەش بکە و ئاسۆیێن نوو ل بەر جڤاکێ ڤەکە.”
د داویا پەیاما خوە دە، سەرۆککۆمارێ ترکیەیێ گرانی دا سەر ئۆپەراسیۆنێن سەربازی و ئیستیخباراتی یێن ل دەرڤەیی سینۆر و تەکەز کر کو ب سایا ستراتەژیا “توندووتووژیێ ل سەرکانیا وێ تونەکرن”، وان کاریبوو ھەم د ناڤخوە دە و ھەم ژی د قادا ناڤدەولەتی دە سەرکەفتنێن چارەنڤیسساز و ستراتەژیک ب دەست بخن.
