پەدەکەسە د سالڤەگەرا دامەزراندنا خوە دە: رێبازا “بارزانیێ نەمر” ھەر تم رێنیشاندەرا خەباتا مە بوویە
پارتیا دەمۆکراتا کوردستانێ – سووریێ (پەدەکە-سێ)، وەکی پێشەنگا تەڤگەرا سیاسی یا کوردی ل سووریەیێ، ئیرۆ دەرباسی سالڤەگارا 69ێ یا دامەزراندنا خوە بوو. مەکتەبا سیاسی یا پەدەکەسێ ب ڤێ بۆنەیێ، پەیامەکا پیرۆزباھیێ ئاراستەیی رایا گشتی و ئالیێن نشتمانی کر.
د پەیامێ دە ھات ببیرخستن کو دەما د 14ێ خزیرانا 1957ێ دە یەکەمین بنگەھێ ڤێ پارتیێ ژ ئالیێ رەوشەنبیرێن کورد ڤە ھات دانین، وەلات د قۆناغەکا ھەستیار دە بوو. دامەزراندنا ڤێ رێخستنێ وەکی میراتگرا تەڤگەرا خۆیبوونێ و بەرسڤەکا پێویست یا وێ دەمێ ھات پێناسەکرن، دا کو ببیتە مەرتالەک ژ بۆ پاراستنا ھەبوون و روومەتا گەلێ کورد ل سەر ئاخا وی یا دیرۆکی.
پەدەکەسێ بال کشاند سەر دیرۆکا خوە یا تژی قوربانی و زەختێن کو ل سەر سەرکردە و ئەندامێن وان د سەردەمێن جودا دە (ب تایبەتی د دەما یەکیتیا سووریا-مسرێ و دەستھلاتا بەعسێ دە) ھاتنە مەشاندن. پارتیێ دا زانین کو وان چ جاران ل ھەمبەری پرۆژەیێن نژادپەرەستێن مینا “کەمبەرا عەرەبی”، “سەرژمێریا ئاوارتە یا 1962یێ” و قەدەغەکرنا زمان و ناڤێن کوردی سەرێ خوە نەچەماندیە.
د داخویانیێ دە ھات گۆتن کو رێبازا “بارزانیێ نەمر” ھەر تم رێنیشاندەرا خەباتا وان بوویە. پەدەکەسێ راگھاند کو ئەو خوە وەکی پارچەیەکا بنگەھین ژ پرۆژەیا نەتەوەیی یا کوردستانێ دبینن، کو ئیرۆ د بن سەرۆکاتیا مەسعوود بارزانی دە و ب کارتێکرنا شۆرەشێن ئیلۆن و گولانێ بەردەوام دکە.
وەکی ستوونا سەرەکی یا ئەنجوومەنا نشتمانی یا کوردی ل سووریێ (ئەنەکەسێ)، پەدەکەسێ جارەکە دن داخوازا یەکتیا ناڤخوەیی یا کوردان کر. د پەیامێ دە ئاماژە ب بریارێن کۆنفەرانسا 26ێ نیسانا 2025ێ ھات کرن و ھات تەکەز کرن کو ژ بۆ سەرکەفتنا دۆزا رەوا، دەستێ وان ھەر تم ژ بۆ ھەر لھەڤکرنەکا نشتمانی یا بەرفرەھ ڤەکرییە.
دەربارێ چارەسەریا کریزا سووریەیێ دە، پەدەکەسێ دەستنیشان کر کو بنگەھا چارەسەریێ د ناسکرنا دەستووری یا مافێن کوردان دەیە. ئەو داخوازا ئاڤاکرنا سووریەیەکا نوو، دەمۆکراتیک و فەدەرال دکن؛ سیستەمەک کو مافێن وەکھەڤ بدە ھەموو پێکھاتەیێن نەتەوەیی (عەرەب، کورد، سوریان، ئاشوور، ئەرمەن، ترکمەن) و پاراستنا ئازادیا ھەموو باوەریێن ئۆلی (مسلمان، کریستیان، ئێزیدی) بکە.
مەکەتەبا سیاسی یا پەدەکەسێ د داویێ دە رێز و سلاڤێن خوە پێشکێشی گیانێ پاکێ شەھیدان، گرتیێن ئازادیێ و ھەموو ئەندامێن خوەیێن فیداکار کر. پارتیێ پەیمانا خوە لگەل گەلێ کورد نوو کر کو ئەو دێ ھەتا گھیشتنا ب دادپەروەری، ئازادی و روومەتێ، ل سەر خەتا تێکۆشینا سڤیل و دەمۆکراتیک بمەشن.
