پشتی 10 سالان، خەلکێ 13 گوندێن زاخۆیێ ڤەدگەرن سەر جھ و زەڤیێن خوە

پشتی راوەستانا شەرێ په‌كه‌كێ و ترکیەیێ و دەستپێکرنا پێڤاژۆیا ئاشتیێ، ئیرۆ خەلکێ 13 گوندێن ل سینۆرێ ناحیا دەرکارێ یا سەر ب زاخۆیێ ڤە، پشتی نێزیکی 10 سالان، ڤەگەریان سەر گوند و زەڤیێن خوە.

حکوومەتا ھەرێما کوردستانێ ب فەرمی رازیبوونا خوە نیشان دا کو خەلکێ ڤان 13 گوندان ڤەگەرە سەر جھ و وارێن باڤ و کالان. ئەڤ بریار وەکی دەرفەتەکێ تێ دیتن دا کو گوندی کاربن جارەکە دن دەست ب خەباتێن خوە یێن چاندنی و گەشتیاریێ بکن.

رێڤەبەرێ ناحیا دەرکارێ جەوھەر محەمەد ژ کوردستان24ێ رە ئاشکەرا کر، ئیرۆ ژ ساعەت 07:00ێ سبێ ڤە گوندیان دەست ب چوونا سەر رەز و باخێن خوە کرنە. محەمەد دیار کر کو د ڤێ قۆناغێ دە گوندی دکارن ھەتا ساعەت 18:00ێ ئێڤارێ ل گوندێن خوە بمینن.

جەوھەر محەمەد ھەر وھا دەستنیشان کر، ئالیێن پەیوەندیدارێن حکوومەتێ دێ د نێز دە سەردانا وان گوندان بکن، دا کو کێماسی و پێویستیێن وان یێن وەکی رێ، ئاڤ و کەھرەبێ دەستنیشان بکن و دەست ب دابینکرنا خزمەتگوزاریان بکن.

رێڤەبەرێ ناحیێ ژ بۆ پاراستنا جانێ وەلاتیان ھشیاریەک دا و بانگ کر کو چ کەس دەستکاریان د مین و تەقەمەنیێن کو ل دەڤەرێ مانە دە نەکە. ھەروھا داخواز ژ گوندیان کر کو گاڤا راستی تشتەکی گومانبار ھاتن، دەملدەست ئالیێن ئەولەھیێ و سازیێن تێکلدار ئاگاھدار بکن.

کوردستان 24