باراك: ئامەریکا و ھەرێما کوردستانێ ل سەر پشتگریکرنا ئیراقەکە خوەدی سەروەری ھەڤنەرینن

نوونەرێ تایبەتێ سەرۆکێ ئامەریکایێ بۆ ئیراقێ، د ھەژمارەکە جڤینێن ئاستبلند دە ل گەل سەرۆک بارزانی، سەرۆکێ ھەرێما کوردستانێ نێچیرڤان بارزانی و سەرۆکوەزیرێ ھەرێما کوردستانێ مەسروور بارزانی، تەکەزی ل سەر پشتگریا واشنگتۆنێ بۆ ئیراقەکە تەنا و خوەدی سەروەری کر. ئەشکەرە ژی کر کو نیقاشێن وان د چارچۆڤەیا دیتنا ترامپ بۆ ئاڤاکرنا “رۆژھلاتا ناڤینا نوو” دە بوونە.

نوونەرێ تایبەتێ سەرۆکێ ئامەریکایێ بۆ ئیراقێ تۆم باراك ئیرۆ (سێشەم، 16ێ خزيرانا 2026ێ) ل سەر ھەسابێ خوەیێ تۆرا جڤاکییا “X”ێ دلخوەشیا خوە ب جڤینێن خوەیێن ئیرۆ يێن ل گەل سەرۆک بارزانی، سەرۆکێ ھەرێما کوردستانێ نێچیرڤان بارزانی و سەرۆکوەزیرێ ھەرێما کوردستانێ مەسروور بارزانی دیار کر.

نوونەرێ تایبەتێ سەرۆکێ ئامەریکایێ بۆ ئیراقێ ئاماژە ب وێ یەکێ ژی کر کو ئالیێن ئامەریکایی و کوردی ل سەر پشتگریکرنا ئیراقەکە پێشکەفتی، کو خوەدی سەروەریەکە تەمام بە، ھەڤدەنگن.

د پارەکە دن یا وێ داخویانیێ دە ھاتیە دیارکرن کو د جڤینان دە گەلەک دەرفەتێن ستراتەژیک د وارێن ئەنەرژی و ئابۆریێ دە ھاتنە نرخاندن. ھەروەسا نیقاشکرنا رێیێن ل پێش بۆ باشترکرنا پەیوەندیێن ناڤبەرا ھەولێر و بەغدایێ تەوەرەکی سەرەکی یێ دانووستاندنان بوویە.