دەم پارتی ژ بۆ پێڤاژۆیا ئاشتیێ بەر ب پارلامەنێ ڤە پێنگاڤان دهاڤێژە و داخوازا “یاسایا چارچۆڤەیێ” دکەت
شاندا ئیمرالیێ یا پارتیا وەکھەڤی و دەمۆکراسیا گەلان (دەم پارتی)، ب ئارمانجا دەرخستنا “یاسایا چارچۆڤەیێ”یا ل سەر پێڤاژۆیا ئاشتیێ، دەست ب ترافیکەکا بەرفرەھ یا ھەڤدیتنان کر. شاندێ خەباتێن خوە لەز کرن دا کو ئەڤ قانوون بەری گرتنا پارلامەنا ترکیەیێ یا ژ بۆ بێھنڤەدانا ھاڤینێ، ببیتە فەرمی.
ئەڤ پێنگاڤا دەم پارتیێ پشتی وێ یەکێ تێ کو “کۆمیسیۆنا دەمۆکراسی، براتی و یەکرێزیا نشتمانی”یا د پارلامەنێ دە، د مەھا شوباتا بۆری دە کارێن خوە ب داوی کرن. کۆمیسیۆنێ د راپۆرتا خوە یا ھەڤپار دە پێشنیارا دەرخستنا “یاسایا چارچۆڤەیێ” کربوو. ل سەر ڤێ بنگەھێ، دەم پارتی و شاندا ئیمرالیێ بزاڤێن خوە زێدە کرنە داکو پێشنیارنامەیێ بەری فینالا خەباتێن پارلامەنێ یا ڤێ وەرزێ بدن پەژراندن.
د ڤێ چارچۆڤەیێ دە، شاندا ئیمرالیێ یا کو ژ پارلامەنتەرێن دەم پارتیێ پەرڤین بولدان و میتحەد سانجار پێک دهێت، سەردانەکا فەرمی ئەنجامدا بۆ دەف سەرۆکێ پارلامەنا ترکیەیێ نومان کورتولموش.
پشتی بداویبوونا جڤینێ، ئەندامێن شاندێ د داخویانیەکا چاپەمەنیێ دە دەستنیشان کر کو وان ھەموو نێرین، بەهانە و داخوازێن خوەیێن دەربارێ گرنگیا ڤێ قانوونێ دە گھاندنە سەرۆکاتیا پارلامەنێ و داخواز کرنە کو بەری بەتلانەیا ھاڤینێ پێنگاڤێن جددی بهێن ئاڤێتن.
چاڤکانیێن سیاسی و زانیار ئاماژەیێ ب وێ یەکێ دکن کو خەباتێن شاندا ئیمرالیێ ب ڤێ ھەڤدیتنێ ب داوی نابن. تێ چاڤەرێکرن کو شاند ژ بۆ پەیداکرنا پشتگریێ، د رۆژێن پێش دە سەردانا سەرکردە و کۆمێن پارتیێن دن یێن سیاسی یێن ل پارلامەنێ ژی بکە.
