ل شەنگالێ بەرپرسەکی یەبەشێ ژ ئالیێ کادرۆیەکی پەکەکێ ڤە ھات کوشتن
ل گۆری زانیاریێن تایبەت یێن کو ژ ھەرێمێ ھاتنە بدەستخستن، بەرپرسەکی لەشکەری یێ ب ئەسلێ خوە عەرەب د ناڤا رەفێن یەکینەیێن بەرخوەدانا شەنگالێ (یەبەشێ) دە، ژ ئالیێ کادرۆیەکی پەکەکێ ڤە ھاتیە قەتلکرن.
چاڤکانیان دان زانین کو ئەڤ کەسێ هاتیە کوشتن، بەرپرسێ تابوورەکا شەرڤانێن یەبەشێ بوویە د فەوجا تەڤگەرلی یا سەر ب لیوایا ماھر تیاوی (کو وەکی یەبەشەیا عەرەبان تێ ناسکرن)، ناڤێ وی یاس مورشد محەممەد عەلی یە (ب ناسناڤێ “ئەرنەستۆ” دھات ناسکرن، ژ دایکبوویی 1997ێ یە و خەلکێ پارێزگەھا سەلاحەدینێ یە)، یاس ھەول دایە ژ رێخستنێ برەڤە. لێبەلێ، د سبەھا 7ێ خزیرانا 2026ێ دە، ھەولا وی ب خوینێ ھاتیە سەکناندن.
ل گۆری زانیاریێن ھاتنە پشتراستکرن، یاس مورشد ژ ئالیێ کادرۆیەکی پایەبلندێ پەکەکێ یێ ب ناڤێ “مەزلووم” (کو ب ئەسلێ خوە ترکمەنە، خەلکێ پارێزگەھا حەسەکێ یا رۆژئاڤایێ کوردستانێیە و نێزیکی 3 مەھن وەکی فەرماندارێ فەوجا تەڤگەرلی ھاتیە ئەرکدارکرن) ڤە ب گولەیەکێ ھاتیە کوشتن. ھات راگھاندن کو کوژەر پشتی لێدانا گولەیێ، ب ئۆتۆمۆبیلێ ژی د سەر لاشێ وی رە دەرباس بوویە و ئەو ل جھێ بوویەرێ ھشتیە.
پشتی روودانێ، لاشێ یاس مورشد ژ ئالیێ ھەژمارەک وەلاتیێن ھەرێمێ ڤە دهێت دیتن و ژ بۆ نەخوەشخانەیا بەعاجێ دهێت ڤەگوھاستن. ل گۆری زانیاریێن داوی، ھەتا نھا ژی تەرمێ وی د نەخوەشخانەیێ دە تێ راگرتن.
