رەڤا ژ راستیێ: چما ئۆجالان ل شوونا ناڤێ دەولەتێن داگیرکەر بدە، خوە د پشت گۆتنێن ئایدۆلۆژیک دە ڤەدشێرە؟
پەیاما ھەری داوی یا عەبدوللاھ ئۆجالان کو د کۆنفەرانسا ئیسلاما دەمۆکراتیکا ل ئامەدێ دە ھات خوەندن، جارەکە دن نیشان دا کو زمانێ سیاسی یێ ناڤەندا ئیمرالیێ چقاسی ژ داخوازێن نەتەوەیی و راست یێن راستەوخۆ یێن گەلێ کورد دوور کەتیە.
ئۆجالان د پەیاما خوە دە ب ھەمان شێوازێ کلاسیکێ چەپبوونا گەردوونی، بانگ دکە کو “دڤێت ئیسلام نەکەڤە خزمەتا دەولەت و ھێزێن سەرمایەدار (کاپیتالیست).” ئەڤ گۆتنێن گشتی و تەئۆریک د دەمەکێ دە تێن زمان کو مەترسیا ھەری مەزن یا ل سەر دین، ناسنامە، ئاخ و ھەبوونا کوردان نە تەنێ سەرمایەداریە، بەلکو راستەراست ئەو پۆلیتیکایێن قرکرن و ئاسملاسیۆنێ نە کو ژ ئالیێ دەولەتێن داگیرکەرێن ل کوردستانێ ڤە ب ناڤێ ئیسلامێ تێن مەشاندن.
ل ڤر پرسەکە جەوهەری سەرهلددە کو ئەو ژی ئەڤە، گەلۆ چما ئۆجالان ب ناڤ و نیشان نابێژە کو “دڤێت ئیسلام نەبە ئاموورا ھۆڤیتیا دەولەتێن ترکیە، ئیران، ئیراق و سووریەیێ”؟ د راستیا دیرۆکی و رۆژانە دە، فرۆکە و درۆنێن دەولەتا ترک ب درووشمەیێن دینی و نەتەوەپەرەست گوندێن رۆژئاڤا و باشوور تۆپباران دکن، رەژیما کۆمارا ئیسلامی یا ئیرانێ ب ناڤێ “شەریعەتێ” جوانێن کورد سێدارە ددە، و رەژیما بەعس ب ناڤێ ئەنفالێ کۆمکوژی ل سەر ڤی گەلی کرن. د دەمەکی وەھا دە، بکارئانینا گۆتنا “ھێزێن سەرمایەدار” ل شوونا تاوانبارکرنا راستەراست یا ڤان چار دەولەتێن داگیرکەر، ھەولەکا ئاشکەرایە ژ بۆ رەڤاندنا بالێ ل سەر نەیارێن ھەری نێزیک و راستەوخۆ یێن دۆزا کوردستانێ.
ئەڤ شێوازێ پاراستنێ یێ کو ئۆجالان ب سالانە د گرتیگەھێ دە پێش خستیە، ھەر کو دچە زێدەتر راستی بەرتەکا رەوشەنبیر و وەلاتپارێزێن کورد تێ. ئەو وەکی لیستکەکا تەئۆریکا بێەنجام تێ نرخاندن کو تێ دە ھەرێم رووبروویی شەر و وێرانیێ دبە، لێ سەرۆکێ رێخستنێ ل شوونا کو ل سەر پاراستنا سینۆر و ستاتویا نەتەوەیی یا کوردان داخویانیان بدە، مژارێ دبە ئاستەکا گەردوونی داکو بەرژەوەندیێن دەولەتێن ھەرێمی و ب تایبەتی ئەنقەرەیێ بپارێزە. ئەڤ زمانێ “سۆسیالیستێ کلاسیک”ێ کو ل سەر مێزێ ئیمرالیێ تێ ھووناندن، ئەنجامەکا دن نینە ژ بلی بێچەککرنا هزری یا جڤاکا کورد ل ھەمبەری مەترسیێن ھەری راستەوخۆ کو ل سەر سینۆران و ل ھەرێمێ روو ددن.
