پهرلهمانێ تركیهیێ دێ بریارێ ل سەر چەکدانین و هلوهشاندنا پهكهكێ دهت
حكوومهتا ترکیەیێ ئامادەکاریا پرۆژەیاسایەکە نوو دکە کو ئارمانجا وێ چەکدانین و ھلوەشاندنا پهكهكێ یە. تێ پایین کو ئەڤ “قانوونا چارچۆڤە” پشتی لووتکەیا ناتۆیێ پێشکێشی سەرۆکاتیا پەرلەمانا ترکیەیێ وەرە کرن.
ل گۆری نووچەیا “BBC Turkish”، حكوومهتا ترکیەیێ قۆناغەکە نوو یا پێڤاژۆیا ئاشتیێ ئامادە دکە. پرۆژەیاسایا کو ژ 10 ھەتا 11 خالان پێک تێ، دێ د 7 ئان ژی 8ێ تیرمەھێ دە (پشتی لووتکەیا ناتۆیێ) وەرە رۆژەڤا پەرلەمانێ و تێ خوەستن کو بەری بەتلانەیا ھاڤینێ وەرە پەسەندکرن.
جیبجیکرنا ڤێ قانوونێ ب شەرتەکی سەرەکە ڤە ھاتی گرێدان؛ ئەو ژی پشتراستکرنا چەکدانینا تەمامی یا پهكهكێ یە. د ناڤەرۆکا پرۆژەیێ دە ئەڤ خالێن سەرەکە ھەنە:
– ژ بۆ ڤەگەرا ئەندامێن رێخستنێ دەما سالەکێ تێ دیارکرن.
– ئەو کەسێن کو ڤەدگەرن و دەستێ وان د تاوانان دە تونە بە، دێ نەیێن گرتن لێ 5 سالان قەدەغەیا سیاسی ل سەر وان تێ دانین.
– ئەڤ ھێسانکاری تەنێ ئەندامێن ئاسایی دگرە ناڤ خوە؛ سەرکردەیێن پهكهكێ ل دەرڤەیی ڤێ قانوونێ نە.
رەوشا عهبدوللا ئۆجالان و ئیمرالیێ
دەربارێ رەوشا رێبەرێ پهكهكێ عهبدوللا ئۆجالان دە، حكوومهتا ترکیەیێ ھەر جورە ستاتویەکە فەرمی یان سیاسی رەد دکە. ل گۆری پرۆژەیێ، ئۆجالان دێ وەکی گرتیەکی ل گرتیگەھا ئیمرالیێ بمینە، لێ دبە کو د قۆناغێن پێش دە رێ بێ دایین کو رۆژنامەڤان و ئاکادەمیسیەن ھەڤدیتنێ ل گەل بکن.
رەوشا ل مەیدانێ: زاپ و قەندیل
چاڤکانیێن ئەولەھیێ یێن ترکیەیێ ئاماژە ب وێ دکن کو ھنەک نیشانەیێن ڤەکشینا گەریلایان ژ ھەرێمێن زاپ، مەتینا، گاره و قەندیلێ ھاتنە دیتن. لێ بەلێ ئاک پارتی دیار دکە کو ئەڤ گاڤ ھین نە د ئاستا داخوازکری دە نە و ئەو ل بەندا کریارێن راستەقین و جدیترن بەری کو قانوون بکەڤە وارێ جبجیکرنێ.
دیرۆکا پێڤاژۆیێ
ئەڤ پێنگاڤا نوو پشتی بانگاوازیا سەرۆکێ مهههپێ دەولەت باخچەلی یا د داویا 2024ان دە دەست پێ کر. د دەستپێکا سالا 2025ان دە ئۆجالان ب پەیامەکە ڤیدیۆیی داخوازا چەکدانینێ کربوو. وەکی گاڤەکە سەمبۆلیک ژی، د تیرمەھا 2025ان دە کۆمەک گەریلایێن پهكهكێ ل دەڤەرا شارباژێر یا پارێزگەھا سلێمانیێ چەکێن خوە شەوتاندبوون و دەست ژ شەر بەردابوون.
