ل وانێ کۆنفەرانسا یەکیتیا نەتەوەیی ھات لدارخستن: “نا ژ بۆ سیاسەتا دەولەتێ و ئەنتەگراسیۆنێ”
کۆمیسیۆنا ھەولدانا کۆنفەرانسا یەکیتیا نەتەوەیی یا باکورێ کوردستانێ، پشتی خەباتێن خوەیێن ل باژارێن قۆسەر، ئیزمیر و روحایێ، چارەمین کۆنفەرانسا خوەیا بەرفرەھ ل باژارێ وانێ ل دار خست. د کۆنفەرانسێ دە داخویانیەکا ھەڤپار ھات دایین و ب توندی ھات دەستنیشانکرن کو ئەو ھەم سیاسەتا دەولەتێ یا “یەکپەرەست” و ھەم ژی سیاسەتا “ئەنتەگراسیۆنا دەمۆکراتیک” یا ئەنیێن دن ب تەمامی رەد دکن.
ئەڤ پلاتفۆرما کو دوھ 27ێ خزیرانێ ھات ئۆرگانیزەکرن؛ ژ ئالیێ پێلکورد، پارتیا سۆسیالیستا کوردستانێ (PSK)، پارتیا وەلاتپارێزێن کوردستانێ (PWK)، تەڤگەرا ڤەژینێ یا کوردستانێ (ڤەژین) و ژمارەکا زێدەیا کەسایەتێن سەربخوە ڤە ھات برێڤەبرن. جڤین ل ھۆلا کۆنفەرانسێ یا یلماز گوونەی یا سەر ب نڤێسینگەها وانێ ڤە، ب بەشداریا نوونەرێن پارتیێن سیاسی، سازیێن جڤاکا سڤیل، نڤیسکار و رەوشەنبیرێن ھەرێمێ هات لدارخستن. د دەستپێکێ دە پشتی دەقیقەیەکا رێزگرتنا ژ بۆ شەھیدێن کوردستانێ، سەرۆکێ تەشکیلاتا وانێ یا پارتییا وەلاتپارێزێن کوردستانێ حووسامەدین ئاجار ب کوردی و سەرۆکێ تەشکیلاتا وانێ یا پەسەکێ تەییب کزلییلدز ب ترکی کورتە-ئاخافتنەکا خێرھاتنێ پێشکێش کرن.
د پانەلا سەرەکی دە، سەرۆکێ گشتی یێ پەسەکێ بایرام بۆزیەل، ل سەر ناڤێ کەسایەتێن سەربخوە ئالۆنجوو، رێڤەبرێ پێلکوردێ کۆرۆگلو کاراسلان، نوونەرێ ڤەژینێ موستەفا دلسۆز و سەرۆکێ گشتی یێ پارتییا وەلاتپارێزێن کوردستسنێ مستافا ئۆزچەلیک ب دۆرێ گۆتارێن خوە پێشکێش کرن. ھەر پێنج ئاخافتنڤانان بال کشاندن سەر وێ یەکێ کو دەولەتا ترکیەیێ سەد سالە ل سەر ھشمەندیا “یەک ملەت، یەک زمان، یەک ئالا” مافێن نەتەوەیی یێن کوردان تونە دحەسبینە. د ھەمان دەمێ دە، رەخنەیێن توند ل خەتا سیاسی یا عەبدوللاھ ئۆجالان، پەکەکە و دەم پارتیێ ھاتن گرتن؛ ھات دەستنیشانکرن کو سیاسەتا “کۆمارا دەمۆکراتیک” مافێ ستاتویا سیاسی و مافێ چارەنڤیسێ یێ ملەتێ کورد پاشگوھ دکە و ئەڤ خەت نابە چارەسەریا پرسگرێکا کوردستانێ.
د پشکا دویەمینا کۆنفەرانسێ دە، نڤیسکار و لێکۆلینەر زیا ئاڤجی، سیاسەتمەدار ئیبراھیم گووچلوو، شێورمەندێ ئابۆری نەجیب ئولودل، بەدرخان ئەپۆزدەمیر، عەبدورەحیم گوومووشتەکن، ل سەر ناڤێ ئینسییاتیفا نەتەوەیی دیار ئۆزباکیش، سەرۆکێ بەرێ یێ کۆمەلەیا مەلایێن کورد مەلا کەرەم، محەمەد بایدار و لەیلا ئەنگین بیر و رامانێن خوە ل سەر ئاڤاکرنا رێکەفتنان ئانین زمان. د داویێ دە، ل سەر ناڤێ دیوانێ سەدات دۆگان سپاسیا بەشداران کر و داخویاند کو ئەڤ خەبات دێ ل باژارێن دن یێن باکورێ کوردستانێ ژی بەردەوام بکن داکو تەمسیلیەتەکا نەتەوەیی و کوردستانی ل سەر پرەنسیبێن پیرۆز بهێتە ئاڤاکرن.
