مستەفا ئۆزچەلیک: سیاسەتا ئۆجالان و دەم پارتیێ مافێن نەتەوەیی یێن کوردان تونە دحەسبینە

سەرۆکێ گشتی یێ پارتیا وەلاتپارێزێن کوردستانێ (PWK) مستەفا  ئۆزچەلیک، د چارچۆڤەیا چارەمین کۆنفەرانسا یەکیتیا نەتەوەیی یا ل وانێ دە داخویانیەکا گرنگ دا و راگھاند کو ئاڤاکرنا تفاقەکا نەتەوەیی و کوردستانی ل باکورێ کوردستانێ “وەزیفەیەکا ئەساسی و دیرۆکییە.” ئۆزچەلیک ب توندی رەخنە ل ھەلوەستا ئەنیا ئیمرالیێ و دەم پارتیێ گرتن و ئەو ب مەشاندنا سیاسەتا “تونەحەسباندنا مافێن ملەتێ کورد” تاوانبار کرن.

کۆنفەرانسا ناڤبۆری کو ژ ئالیێ پلاتفۆرما ھەڤپارا پێلکورد، پارتیا سۆسیالیستا کوردستانێ (پەسەکێ)، پارتیا وەلاتپارێزێن کوردستانێ، تەڤگەرا ڤەژینێ یا کوردستانێ (ڤەژین) و کەسایەتێن سەربخوە ڤە ھاتبوو ئۆرگانیزەکرن، بوو قادا نیقاشێن کوور یێن ل سەر نەخشەرێیا سیاسی یا ھەرێمێ. مستەفا ئۆزچەلیک د گۆتارا خوە دە دیار کر کو دەولەتا ترک ئیرۆ ژی د بن درووشمەیا “ترکیەیا بێ تەرۆر” دە ھەمان سیاسەتا خوەیا سەد سالی یا یەکپەرەست دمەشینە، لێ ل ئالیێ دن، تەڤی ھەموو بەردێلێن گران یێن گەلێ کورد، لیدەرێن وەکی ئۆجالان، پەکەکێ و دەم پارتی د بن ناڤێ “پێڤاژۆیا ئاشتی و جڤاکا دەمۆکراتیک” دە خەتەکا شاش دمەشینن.

ئۆزچەلیک دەستنیشان کر کو تێگەھێن مینا “کۆمارا دەمۆکراتیک، نەتەوەیا دەمۆکراتیک، ئەنتەگراسیۆنا دەمۆکراتیک و ھەموەلاتیا ھەڤبەش” کو ژ ئالیێ دەم پارتیێ ڤە تێن پاراستن، ھەبوونا ملەتێ کورد، مافێن وی یێن هەڤبەش و مافێ ستاتویەکا سیاسی یان چارەنووسیێ ب تەمامی تونە دحەسبینن. سەرۆکێ پارتییا وەلاتپارێزێن کوردستانێ وەکی بەرسڤ راگھاند کو ئەو وەکی ئەنیا یەکیتیا نەتەوەیی ھەم سیاسەتا دەولەتێ و ھەم ژی ڤێ سیاسەتا ئەنتەگراسیۆنێ یا دەمێ رەد دکن، ژ بەر کو ئەڤ خەت نابە رێیا چارەسەریا پرسا کوردستانێ.

ل گۆری داخویانیا ئۆزچەلیک، تفاقا نەتەوەیی یا راستەقینە دڤێت ھەموو ئالی، ئۆل، مەزھەب، رامیاری و فکرێن کو داخوازا ئۆتۆنۆمی، فەدەرالیزم و سەرخوەبوونێ دکن د ناڤا خوە دە بحەوینە. سەرۆکێ گشتی یێ پارتییا وەلاتپارێزێن کوردستانێ بانگەوازیەکا تایبەت ل پۆتانسیەلا وەلاتپارێزا د ناڤ دەم پارتیێ دە کر و گۆت کو ئەڤ جەماوەر نە مەجبووری ڤێ سیاسەتا خەلەتە. وی ھەروھا ئەشکەرە کر کو ئەو وەکی پلاتفۆرم د ھەولدانێ دە نە کو د پاییزا سالا 2026ێ دە ب تەڤلیبوونا ھاک-پار، پەدەکێ-باکور و ئەنیێن دن کۆنفەرانسەکا مەزن و ھەڤپار ل دار بخن داکو مزگینیا مۆدێلەکا نوویا سینەرژی “مفایێ کو ب هەڤکاری یان تێکلکرنا چەند تشتان یان کۆمان پەیدا دبە” و تفاقا نەتەوەیی بگھینن گەلێ کوردستانێ.