ل ئیراقێ ئۆپەراسیۆنا گەندەلیێ ددۆمە، 14 پارلامەنتەر ھاتن دەستەسەرکرن

ھەژمارا وان گومانبارێن کو د “ئۆپەراسیۆنا بەربانگێ” دە ل تەڤاھیا ئیراقێ ھاتنە دەستەسەرکرن گھیشت 21 كه‌سان، ھەتا نھا ل مالێن وان گومانباران دەست دانینە سەر زێدەتری 22 ملیۆن دۆلاران و 124 ملیار دیناران، ھەر وھا دەست دانینە سەر گەلەک خانی و ئۆتۆمۆبیلان ژی.

ئۆپەراسیۆنا بەربانگێ ل 8 پارێزگەھان

ئۆپەراسیۆنێ سبەھا 28ێ خزیرانا 2026ان ل بەغدا و پارێزگەھێن دن یێن ئیراقێ دەست پێ کر و ھەتا نھا ددۆمە، ئەڤ ئۆپەراسیۆن ب چاڤدێرییا راستەراست یا سەرۆکێ ئەنجومەنا بلند یا دادوەریێ فایق زێدان و سەرۆکوەزیرێ ئیراقێ عەلی زەیدی تێ لدارخستن.

بەردەڤکێ حکوومەتا ئیراقێ رۆژا دوشەمێ راگھاند کو ھەتا نھا 21 کەس ھاتنە دەستەسەرکرن. د ناڤ کەسێن دەستەسەرکری دە 13 پارلامەنتەرێن ڤێ ھەیامێ و پارلامەنتەرەکی ھەیاما بۆری ھەنە. ھەر وھا 2 ئالیکارێن وەزیرێ پەترۆلێ یێ ئیراقێ و چەند بەرپرسێن دن ژی ھەنە.

پرانیا وان پارلامەنتەر و بەرپرسان ل ھەرێما کەسکا بەغدایێ ھاتن دەستەسەرکرن. سێ پارلامەنتەر ل ھەولێرێ ھاتن گرتن. کەسێن دن ژی ل زیقار، بابل، سەلاھەدین، واست، نه‌ینه‌وا و ئەنبارێ ھاتن دەستەسەرکرن.

ل گۆری ئاماران، ئۆپه‌راسیۆنێ ھەتا نھا دەست دانیە سەر زێدەتری 22 ملیۆن دۆلار و 124 ملیار دیناران. تشتێ کو ھەتا نھا ب فەرمی ھاتیە ئەشکەرەکرن، سامانا ھەر دو ئالیکارێن وەزیرێ پەترۆلێ یێ ئیراقێ یە.

عەدنان جومەیلی ئالیکارێ بەرێیێ وەزیرێ پەترۆلێ یێ ئیراقێ بوو.

حکوومەتا ئیراقێ دەست دانین سەر 98 ملیار دینار، 11 ملیۆن دۆلار، 70 خانی، 21 ئۆتۆمۆبیل و سێ کیلۆ زێرێن وی.

حکوومەتێ ھەر وھا دەست دانی ل سەر سامانا عەلی مەعارج بەھادلی یێ کو ئالیکارێ وەزیرێ پەترۆلێ یێ کارووبارێن دابەشکرنێ یە ژی.

دەست ب سەر 11 ملیۆنا دۆلار و 4 ملیار دینارێن وی دە ھات گرتن. ھەر وھا دەست دانین سەر گەلەک خانیان و چەند ساعەتێن دەستان یێن گرانبھا یێن وی.

یەک ژ کەسێن دەستەسەرکری ژی ئەنداما پارلامەنتۆیا ئیراقێ بوشرا قەیسییە.، ئەو پارلامەنتەرا فراکسیۆنا ئاڤاکرن و بپێشکەتنێ یەكو  ل مالا وێ دەست دانینە سەر 13 ملیار دیناران.

بوشرا قەیسی نوونەرا پارێزگەھا سەلاھەدینێ یە، وێ د ھلبژارتنێن داوی یێن پارلامەنتۆیا ئیراقێ دە 6 ھەزار و 23 دەنگ ب دەست خستبوون.

ژ بلی بوشرا قەیسیێ، 2 پارلامەنتەرێن دن ژی ل پارێزگەھا سەلاحەدینێ ھاتن دەستەسەرکرن،  یەک ژ وان پارلامەنتەرا فراکسیۆنا ئاڤاکرن و بپێشکەتنێ ھند عەبباسی یە. ئەو تێ تۆھمەتبارکرن کو د سەکتۆرا پارزوونگەھان دە پرۆژە وەرگرتنە.

ھەر وھا پارلامەنتەرا فراکسیۆنا ھەڤپەیمانیا عەزمێ ئەشواق جبووری ژی ھاتیە دەستەسەرکرن، ئەو ژی ب وەرگەرتنا 9 ملیار دینار ژ ئەدنان جومەیلی تێ تۆھمەتبارکرن.